Яруу найрагч, сэтгүүлч Б.Эрдэнэцогтын элэг солиулах эмчилгээнд зориулсан хандивын тоглолт энэ сарын 09-ний баасан гаригийн 19 цагаас “UB palace”-т болохоор болжээ. “Эрдэнэцогт мэдээлнэ…” нэрийн дор болох бүх оддын хандивын тоглолтыг “Шинэ мянган” утга зохиолын нэгдэл санаачлан зохион байгуулж байгаа ажээ. Уг тоглолтод рок, попын болон нийтийн дууны бүх одод, хошин шогийн хамтлаг, продакшнууд, “Болор цом”-ын эзэн яруу найрагчид оролцох юм байна.

Монголын сэтгүүлчдийн эвлэл, Монголын зохиолчдын эвлэл, Монголын радио, телевизийн академи, Монголын телевизүүдийн холбоо, Монголын өдөр тутмын сонинуудын холбоо, Монголын сонины холбоо, Монголын сайтуудын холбоо, Монголын мэдээллийн сайтуудын ассиоциаци зэрэг хэвлэл, мэдээлллийн салбарын бүх байгууллагууд, телевиз, радио, сонин, сайтууд ”Эрдэнэцогт мэдээлнэ…” бүх оддын тоглолтыг дэмжин, хамтран зохион байгуулж байгаа ажээ.
Энэхүү тоглолтын тасалбарыг худалдан авснаар нэгэн үдшийг Монголын урлагийн ододтой хамт өнгөрөөж, сэтгэлийн таашаал эдлэхээс гадна яруу найрагч, сэтгүүлч Б.Эрдэнэцогтын эмчилгээний зардалд өөрийн гэсэн дэмжлэгийг үзүүлэх юм. Б.Эрдэнэцогтын эмчилгээний зардалд зориулан ХААН банкинд 5031681805 тоот данс нээсэн бөгөөд 155889 тусгай дугаарт мессэж илгээж бас болох юм.

Түүнчлэн Б.Эрдэнэцогтын яруу найрагч, сэтгүүлч нөхөд нь хамтран дуудлага худалдаа зохион байгуулж андынхаа эмчилгээний зардлын тодорхой хэсгийг бүрдүүлэхээр болжээ. Үүнд нэртэй зохиолчдын эдэлж байсан үзэг, зохиолч, яруу найрагчдын гарын үсэг бүхий номыг дуудлагаар худалдах юм байна. Мөн уран сийлбэр бүхий монгол шатар, уран бичлэг, хайчилбараар бүтээсэн “Монголын нууц товчоо” болон уран зургийн бүтээл зэргийг дуудлага худалдаагаар зарж  олсон орлогыг нь Б.Эрдэнэцогтын эмчилгээнд хандивлахаар болжээ. Энэ бүхнийг нэгтгэсэн дуудлага худалдааг удахгүй зохион байгуулах гэж байгаа аж.