Голландын алдарт “Аяакс” клубын жигүүрийн хагас хамгаалагч Дерк Боерригтер Шотландын Селтик Гласгоу багтай дөрвөн жилийн гэрээг үзэглэсэн байна. Тэрээр гурван сая фунтын үнэ цэнээр Селтикт иржээ. Өнгөрсөн жил тэрээр багийнхаа төлөө зургаан гоол оруулсан бөгөөд “Аякс” клуб 32 дахь цомоо өргөсөн юм. “Тэр манай багийн тоглолттой нийцнэ. Бидний хүсээд байгаа тоглолтыг тэр гаргана гэж найдаж байгаа. Манай багийн зуны солилцоо наймааны эхэнд тэрний нэр байсан юм шүү” гэж Селтикийн менежер Нил Леннон ярьжээ. Тэрээр карьерийнхаа туршид зургаан баг дамжиж 50 гоол оруулжээ. 2006-2007 оны улиралд “Аякс” клубт анх удаа талбайд гарч тоглосон ч гоол оруулаагүй бөгөөд баг нь түүнийг зээлээр даруухан багуудад тоглуулж байсан юм. Харин 2011 оны улиралд Аякстаа дахин ирж Голландын аварга болсон билээ.