Монголын ширээний теннисний холбооны урилгаар БНАСАУ-ын армийн “Дөрөвдүгээр сарын 25” клубын дасгалжуулагч багш Жу Юүн Ху, шавийн хамт өнгөрөгч сард манай улсад ирээд байна. БНАСАУ-ын дасгалжуулагч багш Жу Юүн Хугийн хувьд нэг жилийн хугацаанд манай улсад багшлах юм байна. Одоогоор “Оч” ширээний теннисний клуб дээр зуны сургалтыг явуулж байгаа бөгөөд тус сургалтанд монголын шилдэг өсвөрийн тамирчид Жу Юүн Ху багшийн удирдлага доор хичээллэж байна.

Жу Юүн Ху дасгалжуулагчийн хувьд 1972-1985 оны хооронд БНАСАУ-ын ширээний теннисний үндэсний шигшээ багийн тамирчин байжээ. Энэхүү хугацаандаа ганцаарчилсан төрлийн дэлхийн рейтингээрээ 15 хүртэл дэвшиж байсан байна. 1985-1997 оны хооронд БНАСАУ-ын армийн "Дөрөвдүгээр сарын 25" клубын дасгалжуулагчаар ажиллажээ. Жу Юүн Ху дасгалжуулагчийн хувьд 1991 онд Япон улсад зохиогдсон ширээний теннисний ДАШТ-нд өмнөд болон хойдчууд анх удаа нэг далбаан доор оролцоход ахлах дасгалжуулагчаар оролцож байсан байна.

Дашрамд дуулгахад, монголын өсвөрийн эрэгтэй баг энэ сарын 31-нээс ирэх сарын 3-ны хооронд БНСУ-ын Дэжон хотноо болох Олон улсын тэмцээнд оролцохоор бэлтгэлээ хийж байна. Тус тэмцээн 12-14, 15-17 насны ангилалаар болох бөгөөд манай улсын эрэгтэй баг (найман хүүхэд) оролцох юм байна.