Капитал банк нийгмийн хариуцлагыг хэрэгжүүлэх ажлынхаа хүрээнд “Дуун өргөө” төрийн бус байгууллагатай хамтран хүмүүний бие биеэ санан үгүйлэх, эх нутаг, элгэн садан, энхрий хайртай бүхнээ харь холын нутгаас тэмүүлэн мөрөөдөх нарийн дотно харилцаа, сэтгэлийн нандин уулзалт, учралыг үзэгч түмнээ нээн харуулах зорилгоор зохион байгуулж буй “Зүрхний холбоо” төслийн азтанаар тодорсон 5 иргэн хайртай дотно, ах дүү, хамаатан садантайгаа уулзах алтан боломжийн эзэд болж энэ 7 дугаар сарын сүүлээр БНСУ-ыг зорихоор болсон билээ.

Түүнчлэн тус улсад үнэ төлбөргүй бүх төрлийн шинжилгээ өгч, эмнэлгийн иж бүрэн үзлэгт хамрагдах юм.

Мөн төслийн хүрээнд хийморьлог эрхэмүүдээ УБ хотоос 52км-н зайтай орших “Наранбулаг” амралт-сувилалын газарт амрааж, иог бясалгалын эрүүл мэндийн хичээлд хамруулж байгаа бөгөөд Капитал банкны Бизнесийн хөгжлийн газрын захирал Б.Ганбаатар тэргүүтэй төлөөллүүд, төслийг санаачлагч “Дуун өргөө” ТББ-ын тэргүүн СТА жүжигчин Ё.Алтангэрэлийн хамт тус амралтын газарт энэ сарын 18-нд хүрэлцэн очсон юм.

Зүүн талаас азтан Д.Сүхбаатар, Н.Үүрийнтуяа, Капитал банкны Бизнесийн хөгжлийн газрын захирал Б.Ганбаатар, азтан Д.Мөнхцэцэг, Ж.Энхболд нар

Төслийн азтангуудтай уулзалт хийн, санал сэтгэгдлийг нь сонсож, халуун дотно яриа өрнүүлэн, бэлэг дурсгалын зүйлс гардуулж, уг төсөл хамтын ажиллагааг цаашид үргэлжлүүлэн 5 азтан тус бүрээр аялалын тухай нэвтрүүлэг бэлтгэхийг уламжлан баяр хүргэв.

Азтангуудын зүгээс тус амралт-сувилалын газарт амарч байгаадаа тун ч их сэтгэл хангалуун, гүн талархаж байгаа гэдгээ, “Зүрхний холбоо” төслийг санаачлагч Капитал банкны удирдлага, хамт олон болон бусад ивээн тэтгэгч “Ж-Мобайл” XXK, “MGLclub.com” вэбсайт , МҮОНРТ, TВ9, ЕТV, ТВ8, “Шинэ дэлхий” телевизүүд, “Кантри Воюаж” ХХК зэрэг компаниуд болон “Наранбулаг” амралт-сувилалын газрын хамт олонд илэрхийлсэн билээ.

Энэ дашрамд Капитал банкны зүгээс “Зүрхний холбоо” төслийг амжилттай зохион байгуулахад хичээнгүйлэн хамтран ажиллаж буй байгууллагуудын удирдлага, ажилтнуудад чин сэтгэлийн талархал дэвшүүлснийг уламжилж байна.