Лос-Анжелес Лейкерс клубын хүчний довтлогч Метта Ворлд Пийс Нью-Йорк хотын багтай хоёр жилийн гэрээгээр хүрэлцэн ирээд байна. 2009 онд 33 саяын үнэ цэнээр, таван жилийн хугацаатай ирж байсан тэрээр Нью-Йоркод жилийн 7,7 сая ам.долларын цалин авах юм. “Би энд төрөлх хотдоо ирсэндээ үнэхээр баяртай байна. Лейкерсд би гайхалтай жилүүдийг үдлээ. Одоо би төрсөн хотдоо зүтгэх цаг нь болсон. Ямар ч байсан амжилт гаргахын төлөө хичээж тоглох болно” гэж Метта Ворлд Пийс ярьжээ. Тэрээр NBA-д 14 жилийг үдэхдээ таван өөр багт хүчин зүтгэж, 14,1 оноо, 4,7 самбараас бөмбөг авалтыг дунджилж байжээ. 1999 оны драфтын 16 дахь сонголтоор Чикагогийн бухнуудын эгнээнд нэгдэж байсан тэрээр дөрвөн өөр багаар плей-оффт шалгарч зөвхөн плей-оффд 13,9 оноог дундажлаад байна.