Голландын агуу зураач Рембрандт Ван Рейний Их Британид хадгалагдаж буй алдарт бүтээлийг тус улсаас гаргахыг хориглосон байна. Учир нь  хосгүй үнэтэй уг бүтээлийг тус улсаас гаргаж, 16.5 сая фунт стирлингээр худалдах гэж байсныг тогтоожээ. Агуу зураачийн 1628 онд туурвисан “Инээж буй эр”-ийн хөрөг өнгөрсөн тавдугаар сард Лос Анжелесийн нэгэн дуудлага худалдаанд зарагдсан юм. Их Британийн Соёлын сайд агуу зураачийн бүтээлүүдийг тус улсаас гадагш гаргах зөвшөөрөл олгохыг ирэх аравдугаар сар хүртэл хойшлуулах шийдвэр гаргасан байна.

Ердөө алгын чинээ хэмжээтэй уг бүтээлийг XVII зууны  Голландын агуу зураачийн өөрийнх нь хөрөг гэж үздэг. Уг бүтээлийг Рембрандтын жинхэнэ бүтээл гэдэгт эргэлзээ байсан тул 2007 онд нэгэн дуудлага худалдааны үеэр ердөө 1500 фунт стирлингээр зарагдсан юм. Харин дараа нь уг бүтээл өөр нэг дуудлага худалдаанд ширүүн үнэ хаялцааны дараа 2.2 сая фунтаар зарагдсан байдаг. Дээрх дуудлага худалдаанаас есөн сарын дараа Рембрандтын судалгааны төвийн тэргүүн Эрнст ван де Ветеринг уг бүтээлийг түүний жинхэнэ бүтээл болохыг баталсан билээ.

Рембрандтын бүтээлүүдээс хамгийн өндөр үнэ хүрсэн нь 2009 онд дуудлага худалдаанд 20,2 сая фунт стирлингээр зарагдсан “Portrait of a Man” бүтээл юм.