“Шиврэн шиврэх бороо минь
Ширүүсээд өгөөч наддаа
Чиний шаагих шиврээнд чинь
Сэтгэл минь ханахгүй л байна…” яг одоо энэ дууны клипийг үзэн 19.00 цагийг тэсэн ядан хүлээнэ. Учир нь энэ дууны эзэн өнөөдөр “Морих хуур, Толин хул” тоглолтоо Соёлын төв өргөөнд 19.00 цагт тоглохоор товоо зарласан юм. Надамчиддаа зориулан бие даасан тоглолтоо өнөөдөр маргааш эгшиглүүлэн үзэгчдийг дэнслэн догдлуулах түүний дуунууд цаг хугацаа өнгөрөх тусам сэтгэлд улам л ойр эгшиглэсээр. Өнөөдөр “Харанга”-ын дуучин Х.Лхагвасүрэнгийн хит дуунуудыг нэг дор сонсоно гэхээр одоо ч гүйж очоод хүлээгээд суумаар.

Домог мэт “Харанга” хамтлагийн 25 жилийн ой ирэх жил болно. Их ойн жил болж буйтай холбоотойгоор “Харанга” хамтлагийн дуучин Х.Лхагвасүрэн ийнхүү бие даасан тоглолтоо хүргэж буй. Түүний тоглолтод “Харанга” хамтлаг, ҮДБЭЧ, зэрэг олон уран бүтээлчид оролцох нь ээ. Тэрээр фейсбүүк дэхь цахим хуудсаараа дамжуулан фенүүдээсээ тоглолтондоо дуулагдах дууныхаа саналыг авсан юм. Тийм болохоор хүн бүрийн сэтгэлд хоногшсон болоод шинэхэн дуунууд нь үзэгчдэд хүрэх нь ээ.

Сонирхуулахад, “Харанга” хамтлагийн 25 жилийн ойдоо зориулсан тоглолтын салхийг өнгөрсөн тавдугаар сард тус хамтлагийн гитарчин Я.Одсүрэнгийн “Оогий Харангатайгаа, гитартайгаа, найзуудтайгаа” тоглолтоор эхлүүлсэн бөгөөд Х.Лхагвасүрэнгийн тоглолтын дараа ирэх есдүгээр сард Ц.Чулуунбат, арваннэгдүгээр сард А.Энхманлай нарын бие даасан тоглолт болно. Харин тэд ирэх оны эхээр тэд БНСУ, АНУ, Европт аялан тоглолт хийнэ гээд бүтэн жилийн турш фенүүдээ баярлуулна гэсэн шүү.

“Харанга” хамтлагийн “Бороо” дууны клипийг эргэн хамтдаа сонирхоё. 2009 онд у дууны клипийг “Ondo Design” багийн уран бүтээлчид бүтээж байсан юм. Бороонд “Харанга”-тай цуг алхая.