Ардын хувьсгалын 92 жилийн ойн баярын хүчит бөхийн барилдаанд тав давж начин, зургаа давж улсын харцага цол хүртсэн залуу хүчтэнүүдэд Монгол Улсын Ерөнхийлөгч Ц.Элбэгдоржийн зарлигаар үндэсний бөхийн улсын начин, харцага цол хүртээлээ.

Тодруулбал, наадмын зүлэг ногоон дэвжээнээ зургаа давж, шинээр улсын харцага цолны болзол хангасан Монгол Улсын Хөдөлмөрийн баатар, Гавьяат тамирчин, Бээжингийн олимпийн аварга, аймгийн арслан Н.Түвшинбаяр, аймгийн арслан Б.Батсуурь, аймгийн арслан Э.Оюунболд нарт, мөн тав давж, улсын начин цолны болзол хангасан Т.Баасанхүү, Л.Цэрэнтогтох нарт цол хүртээсэн юм. Энэ үеэр Монголын залуучуудын холбооноос өнөө жилийн наадмын хамгийн залуу начин Т.Баасанхүүгийн цолыг мялааж, хурдан удмын даага бэлэглэлээ.