Мэргэжлийн сумогийн Нагоя башёгийн тав дахь өдөр япончуудын гол найдлага болоод байсан озэки Кисэносато Чиётайрюүгийн окуридаши мэхэнд унаснаар ёкозүна цол хүртэх горьдлого нь тасарлаа. Өнгөрсөн башёд 14 давж, нэг унасан Кисэносатог энэ удаад дахиад 14 давбал түрүүлээгүй ч гэсэн ёкозүна цол олгоно гэж Сумогийн холбооноос хөнгөлөлт үзүүлсэн билээ. Гэвч тэрээр эхний таван өдөрт хоёрантаа унаснаар ийнхүү болзол хангах ямар ч боломжгүй боллоо.

Нагоя башёг Японы Эзэн хааны цомыг 25 дахиа хүртээд буй ёкозүна Хакухо М.Даваажаргал босоо тэргүүлсээр байна. Өнөөдөр Хакухо Гагамаруг ялсан юм. Ингэснээр Хакухогийн дараалсан давааны тоо 41-д хүрээд байна.

Харин ёкозүна Харумафүжи Алтангадас начны хүү А.Хүчитбаатар буюу Токитэнкүг ялснаар дөрвөн даваа нэг унаатай болов.

Озэки Какурюү харин Такаясүд ялагдаж, гурван даваа хоёр унаатай боллоо. Болгарын озэки Котоошюү өнөөдөр Мёгирюүг ялснаар таван даваатайгаар Хакухотой зуузай холбосоор байна.