-Хөрөнгө мөнгөний асуудлаас болоод дэд бүтцийг шийдвэрлэж чадахгүй байлаа. Гэхдээ бид анхан шатны байдлаар сайжруулсан шороон зам тавьж, ОХУ руу орох гарцаа нээсэн. Холбогдох дүрэм журам батлагдсан. Чөлөөт бүсэд газар авсан компаниуд газар авснаа чухалчлаад үйл ажиллагаа эхлэхгүй юм. Тэд үйл ажиллагаа эхлүүлэх хэрэгтэй байна.
-Танай бүсэд хэчнээн компани үйл ажиллагаа явуулах вэ?
-Одоогоор зургаан орны 140 гаруй аж ахуйн нэгжтэй хөрөнгө оруулалтын гэрээ байгуулж /чөлөөт бүсэд үйл ажиллагаа явуулах эрх/, газраа хуваарилсан. Үүнээс дотоодын компани 288.6 га, гадаадын компанид 32.2 га газрыг хуваарилаад байна. Нийтдээ 700 орчим сая ам.долларын хөрөнгө оруулалт хийгдэх юм.
-Чөлөөт бүсэд компаниуд ямар ямар үйл ажиллагаа явуулах вэ?
-Бүртгэлээс харахад, дотоодын үйлдвэр 25, худалдаа эрхлэх 57, үйлчилгээний 41 компани, агуулахын үйл ажиллагаа явуулах 46, зочид буудал 15, банк гурав байна. Харин гадны компаниуд ихэвчлэн худалдаа эрхлэх юм.
-Монголын эдийн засаг хөгжихөд тулгуур болох үүднээс чөлөөт бүсийг байгуулж байгаа. Харин “Алтанбулаг” чөлөөт бүс ашиглалтад орсноор …?
-Манай бүсэд үйл ажиллагаа эрхэлснээр Монголд үйлдвэрлэсэн 7200 гаруй нэр төрлийн бараа, бүтээгдэхүүнийг гаалийн болон тарифын аливаа хязгаарлалтгүй Европын холбооны орнуудад нийлүүлэх шийдвэр хэрэгжиж байгаа энэ үед чөлөөт бүсэд экспортын чиглэлийн үйлдвэрийг олноор барьж, бүсээр дамжуулж бараа бүтээгдэхүүнийг гадаад зах зээлд гаргах өргөн боломж нээгдэх юм.
-Бүс нээгдсэн гэж ойлгож болох уу. Тэнд байх төрийн үйлчилгээний байгууллагууд төвхнөсөн үү. Хил гаалиар нэвтрэхэд ямар дүрэм журам мөрдөх вэ?
-Нээгдсэн гэж хэлж болно. Бүсэд мөрдөгдөх гаалийн, татварын, хил хамгаалалтын, мэргэжлийн хяналтын, иргэдийн зорчих, оршин суух болон визийн, харуул хамгаалалтын шалган нэвтрүүлэх зэрэг есөн журмыг боловсруулан холбогдох байгууллагуудаар батлуулсан. Өнгөрсөн дөрөвдүгээр сараас эхлээд тэнд мэргэжлийн албад бүрэн ажиллаж эхэлсэн. Гарцаа нээсэн байгаа тухай дээр би хэлсэн. ОХУ-аас бүс рүү орж ирэхэд визгүй орохоор зохицуулсан. Гэвч хоёр улсын Засгийн газар хоорондын хэлэлцээрээр визтэй зорчих ёстой гэсэн заалт бий. Тиймээс ОХУ-ын талаас визтэй байх шаардлага тавьж байна. Тэгэхээр Засгийн газар хоорондын хуралдаанаас энэ асуудлыг шийдвэрлэх хэрэгтэй байна.
Б.СҮРЭН