Үндэсний их баяр наадам тохиолдуулж, Монгол Улсын Ерөнхийлөгчийн зарлигаар спортын салбараас өчигдөр нэг гавьяат цолтон, мөн Ардын багш төрсөн бол өнөөдөр Хөдөлмөрийн гавьяаны улаан тугийн одон, Алтангадас одонтнуудад шагнал гардууллаа.

Монгол Улсын нэрийг тив, дэлхийн тавцанд цуурайтуулж, амжилт гаргасан тамирчдыг Соёл, спорт, аялал жуулчлалын дэд сайд М.Түмэнжаргал хүлээн авч, одон гардуулав. Тодруулбал, волейболын спортын ОУХМ Ж.Хаянхярваа, төрөлжсөн сургалттай Биеийн тамир, спортын дунд сургуулийн багш, дасгалжуулагч, чөлөөт бөхийн олон улсын шүүгч Г.Баясгалан нар Хөдөлмөрийн гавьяаны улаан тугийн одон хүртсэн бол боксын ОУХМ З.Энхзориг, чөлөөт бөхийн ОУХМ Ж.Чулуунбат, Д.Отгонцэцэг нар Алтангадас одонгоор шагнуулсан юм.

Өчигдөр Ерөнхийлөгчийн зарлигаар Азийн наадмын аварга, Ази тивийн
аварга, 2008 оны Бээжингийн олимпийн 5-р байрын шагналт, самбо бөхийн
Дэлхийн аварга, жүдо бөхийн ОУХМ Дамдинсүрэнгийн Нямхүү Монгол Улсын
Гавьяат тамирчин цол хүртсэн бол ЦЕГ-ын Тусгай хэлтсийн биеийн
бэлтгэлжилт хариуцсан ахлах байцаагч, цагдаагийн хурандаа Буянгийн
Ганбат Ардын багш цолны эзэн болсон билээ.

С.ЦЭЛМЭГ

Хөдөлмөрийн гавьяаны улаан тугийн одон хүртсэн Волейболын спортын ОУХМ Ж.Хаянхярваа

Алтангадас одонгоор шагнуулсан чөлөөт бөхийн ОУХМ Д.Отгонцэцэг

Хөдөлмөрийн гавьяаны улаан тугийн одон хүртсэн чөлөөт бөхийн олон улсын шүүгч Г.Баясгалан

Алтангадас одонгоор шагнуулсан чөлөөт бөхийн ОУХМ Ж.Чулуунбат