Мэдээлэл харилцаа холбооны салбарынхны бүтээгдэхүүн үйлчилгээгээ олон нийтэд нээлттэйгээр танилцуулдаг “ICT экспо” арга хэмжээний үеэр Мобиком корпораци програм хөгжүүлэгчдийнхээ дунд анх удаагаа ухаалаг утасны шагналтай “Мобиком Open API” уралдааныг зохион байгуулж байгаагаа зарласан билээ. Харин Үндэсний их баяр наадмын өмнөхөн тэд уралдааныхаа дүнг гаргаж, оюун ухаан мэдлэг чадвараа Монголын програм хөгжүүлэлтийн төлөө чиглэлээр тууштай ажиллаж байгаа залуустаа шагналыг нь гардуулж, урам өглөө.

Монголын програм хөгжүүлэгчдийн дунд нээлттэй хөгжүүлэлтийг дэмжих зорилгоор зохион байгуулсан MOBICOM  Open API уралдаанд 100 гаруй хөгжүүлэгчийн 37 апликейшн оролцохоор бүртгүүлснээс цаашид өргөнөөр ашиглагдаж олон нийтийн хүртээл болох боломжтой, Мобикомын АPI-г ямар нэгэн хэмжээгээр ашигласан, загвар дизайн хийц зэрэг үзүүлэлтээр оноо өгч 5 бүтээлийг шалгаруулжээ.

Цахим ертөнцөд байршуулсан апликейшныг Мобиком корпорацийн Маркетингийн газар болон Мэдээллийн Технологийн газрын захирлууд, програм хөгжүүлэгчдийн бүрэлдэхүүнтэй баг шүүж  тус бүрийн нийлбэр дүнгээр ялагчдыг тодруулсан юм. 1-р байрт Б.Цэрэнсодном “Моби роуминг”,  2-р байрт Ч.Энхбазар “Fly SMS fly” програмаар шалгарч Samsung Galaxy S4, Sony Xperia Z утасны эзэд боллоо. Мөн уралдаанд идэвхтэй оролцон нээлттэй хөгжүүлэлтийг ашигласан “Моби дата”, “Little Spy”, YellowBox, “Энэ хэн бэ” програмуудын хөгжүүлэгч Ц.Наранбаяр, Я.Цолмон, Ц.Гантулга нарт дурсгалын зүйлс гардуулан цаашид нээлттэй хөгжүүлэлтийн чиглэлээр улам илүү амжилт гарган ажиллахыг хүсэн ерөөлөө.