Хөгжмийн зохиолч Н.Ононгийн “Ертөнц” цомог борлуултад гарсан цагаасаа “Hi-Fi Records”-ийн шилдэг цомгийн жагсаалтыг 11 долоо хоногийн турш тэргүүлж, хөгжим сонирхогчдын дунд дөрвөн сарын турш “хит” байсаар байгаа юм.

“Брос Рекордс”-ын тэнгэрийн өнгөтэй “Ертөнц” цомог өнөөдөр тайзан дээрээс таны сонорыг мялаах гэж байна. Тодруулбал, энэ сарын 5-наас ирэх наймдугаар сарын 19-нийг хүртэл “Universe Live” тоглолт Монголын Хүүхдийн ордны бэсрэг танхимд өдөр бүр 18.00 цагт эгшиглэх нь ээ.

Эх орныхоо аялал, жуулчлалын салбарт орчин үеийн урлагийн үндэсний брэнд бүтээж, хөгжүүлэх эрхэм зорилго өвөртөлж буй “Universe Live” тоглолтонд “Ертөнц” цомгоос гадна “Introduction to Nomads” цомгийн “Бороо” бүтээл тоглогдох юм байна.

Тоглолтод “Ертөнц” цомгийн хөгжмийн зохиолч Г.Онон даралтат хөгжим, товшуур, хэц, хэл хуурыг эгшиглүүлэх бол продюсер М.Болд ерөөл, товшуур тоглох бол “A Sound” хамтлагийн хөгжимчин Ц.Алтангэрэл буюу Атка гитар, хобис, Ю.Батпүрэв бөмбөр, Д.Мөнхболд басс гитар тоглох юм. Мөн “Бөртэ” хамтлагийн хөгжимчин Ч.Мөнх-Эрдэнэ ятга, хөгжимчин Ш.Баяржаргал даралтат хөгжим, Л.Саруулбат лимбэ, флейт тоглон “Ертөнц” цомгийг эгшиглүүлэх аж.

Мөн “Ертөнц” цомгийг бүтээж эхэлсэн цагаас хамт байсаар ирсэн Монголын шилдэг хөгжимчид оролцож, “Дэлхий” хамтлагтай хамтран тоглож байгаа нь онцлог юм.  Орчин үеийн урлагт үндэсний брэнд бүтээх зорилготой тэдний эрхэм хүсэл бол эх орныхоо урлагийг ертөнц дахинаа сурталчлах юм. Энэ зуныг “Ертөнц”-ийн аялгуугаар амьсгалан зугаатай өнгөрүүлээрэй.

Тоглолтын тасалбар 20 мянган төгрөг байх ба гадаадын иргэдэд 30 мянган төгрөгөөр “Ертөнц”-ийн сонорыг хүргэх нь ээ.