Английн алдарт метал рок хамтлаг “Motorhead” олон сая шүтэн бишрэгчдээ удаан хугацаанд хүлээлгэсэний эцэст энэ зун аялан тоглолт хийхээр болсноо албан ёсоор зарлаад байсан. Харамсалтай нь хамтлагийн гишүүн Леммигийн эрүүл мэндийн байдлаас болж тэд Герман, Франц болоод ОХУ-д хийх аялан тоглолтуудаа цуцлахад хүрээд байгаа юм байна. Энэ тухай Лемми хамтлагийнхаа цахим хуудсанд мэдээлж, эмч нар түүнд өөрийгөө маш сайн амраах хэрэгтэй хэмээн зөвлөсөнийг фэнүүддээ ийнхүү дуулгажээ.

Хамтлаг анх бүрэлдсэн цагаас одоог хүртэл уран бүтээлээ туурвисаар яваа Лемми дан ганц Европ төдийгүй дэлхийн нэртэй хөгжимчдийн нэгд зүй ёсоор тооцогдох рок оддын нэг. Судасны хатуурал өвчнөөс болж өнгөрөгч зургадугаар сард мэс засалд хүртэл орсон тэрээр цахим хуудсаараа тун удахгүй фэнүүдтэйгээ эргэн уулзахаа амласан байна. Хэдийгээр ийнхүү тааруу мэдээтэй байгаа ч “Motorhead” ирэх есдүгээр сард “Aftershock” нэртэй 21 дэх цомгоороо шүтэн бишрэгчиддээ бэлэг барихаар ажиллаж байгаа гэнэ. Сонирхуулахад, ирэх 2015 онд хамтлагийнхны  40 жилийн ой тохиох аж.