Нийслэлийн Аврах ангийн Эрэн хайх аврах салбар БЗД-ийн 20 дугаар хорооны Хар усан тохойгоос Сонгины амралт хүртэлх Туул голд завьт эргүүлийг ажиллуулж эхэлжээ. Энэ нь Нийслэлийн Онцгой байдлын газар, цагдаагийн газрын хамтарсан удирдамжийн дагуу иргэдийг  голын усанд осолдож амь насаа алдахаас урьдчилан сэргийлэх зорилготой бөгөөд завьт эргүүл наймдугаар сарын 20 хүртэл ажиллах юм байна. Зургадугаар сарын 20-ноос хойш завьт эргүүлийнхэн 354 иргэнд сэрэмжлүүлэг хүргэж ажилласан талаар албаныхан мэдээллээ.

Өнгөрсөн онд нийслэлийн хэмжээнд 21 иргэн голын усанд осолдож амь насаа алдсан байна. Тиймээс аялал зугаалга, амралтын үед иргэд аюулгүй байдлаа хангаж, цаг агаарын мэдээг тогтмол хүлээн авч, баталгаат зам гүүрээр зорчиж, машинаар гол гатлахыг оролдохгүй байх, бага насны хүүхдийг хяналттай байлгах, голын усны төвшин нэмэгдсэн үед голд сэлэхгүй байхыг Нийслэийн Онцгой байдлын газраас анхаарууллаа. Цаг агаарын хувьд ойрын өдрүүдэд дуу цахилгаантай, усархаг түр зуурын бороо орох төлөвтэй байгаа ажээ.