Монгол ардын намын Мэдээллийн технологийн хэлтсийн дарга Б.Цогтгэрэлийн бусдыг гүтгэсэн хэргийг өнөөдөр Нийслэлийн давж заалдах шатны шүүхэд хэлэлцжээ. Нийслэлийн шүүхээс Б.Цогтгэрэлийн анхан шатны шүүхээс оноосон торгуулийг эсэргүүцсэн гомдлыг хэлэлцээд Чингэлтэй дүүргийн шүүхийн шийдвэрийг хэвээр үлдээжээ.  

Чингэлтэй дүүргийн шүүхээс Б.Цогтгэрэлийг хэвлэл мэдээллийн хэрэгслээр бусдын нэр хүндэд ноцтойгоор халдсан гэж буруутган 20 сая төгрөгийн торгууль ногдуулсан юм. Б.Цогтгэрэл нь өнгөрсөн оны арваннэгдүгээр сард болсон орон нутгийн сонгуулийн үеэр Орхон аймагт нэр дэвшсэн н.Улаанхүүг хүний аминд хүрсэн хэмээн хэвлэл, мэдээллийн хэрэгслээр зарлаж, бусдыг хүнд гэмт хэрэгт гүтгэсэн гэж хоёр шатны шүүхээс ийнхүү үзлээ.