Монгол Улсын Ерөнхийлөгчийг тодруулах сонгуулийн санал хураалт үргэлжилж байна. Сонгуулийн ерөнхий хорооноос санал хураалт эхэлснээс хойшхи сонгогчдын ирцийн мэдээг 15.00 цагийн байдлаар нэгтгэн 15.30 цагт олон нийтэд хүргэлээ. Үүгээр улсын хэмжээнд санал хураалтад оролцсон сонгогчдын ирц 43.07 хувьтай байна. Аймгуудаас Завханы сонгогчдын ирц хамгийн өндөр буюу 51.07 хувьд хүрсэн байгаа бол хамгийн сүүл мушгиж яваа нь Дорноговь аймаг болж байна. Тодруулбал, тус аймагт сонгогчдын ирц 39.89 хувьтай явна. Бусад аймгийн сонгогчдын ирц 40-46 хувийн ирцтэй байна.

Нийт сонгогчдын 50 хувь нь шахам оршин суугаа Улаанбаатар хотын хэмжээнд авч үзвэл сонгогчдын ирц хамгийн тааруу байгаа дүүрэгт Сонгинохайрханыг нэрлэж болохуйц байна. Одоогоор тус дүүрэгт сонгогчдын ирц 39.28 хувьтай явна. Харин Багануур дүүрэгт саналаа өгсөн сонгогчийн ирц 42.55 хувьд хүрсэн нь бусад дүүрэгтэй нь харьцуулахад хамгийн өндөр үзүүлэлт болж байна. Багануур дүүргийн хувьд нийт 18 мянган сонгогчтой юм.

НЭМЭЛТ 19:50 цагт:

Сонгуулийн ерөнхий хорооноос ээлжит мэдээллээ 19.30 цагт хийлээ. 19.00
цагийн байдлаар улсын хэмжээнд бүх аймаг, дүүрэгт сонгуулийн ирц 50
хувьдаа хүрчээ. Улсын хэмжээнд сонгуулийн ирц 57,73 хувьтай, үүнээс орон
нутагт 57,25, нийслэлд 58,35 хувьтай байна. Аймгаар нь авч үзвэл Завхан аймгийн сонгогчдын ирц 63.67 хувьд хүрсэн нь хамгийн өндөр үзүүлэлт болж буй юм. Сонгуулийн ерөнхий хорооноос 15.30 цагт мэдээлэл хийхэд тус аймаг саналаа өгсөн сонгогчийнхоо ирцээр бусад аймгаа тэргүүлж байсан бөгөөд энэ үзүүлэлтээ алдсангүй дахин хамгааллаа. Сонгуульдаа идэвхитэй оролцож байгаа аймгаар Говь-Алтай, Увсыг нэрлэж болохуйц аж. Дээрх аймгуудад саналаа өгсөн сонгогчийн ирц 61.25-61.89 хувьтай байна.

Дээрх үзүүлэлтээр авч үзвэл нийслэлийн есөн дүүргээс Багахангай тэргүүллээ. Тус дүүргийн хувьд нийт сонгогчийнх нь 62.33 хувь саналаа өгчээ. Араас нь Баянгол 61.97 хувийн ирцээр нэхэж яваа бол Хан-Уул 60.73 хувийн ирцтэйгээр гуравт жагсаж байна. Хүн амын тоогоороо Улаанбаатар хотдоо хоёрт жагсдаг Сонгинохайрхан дүүрэг 15.30 цагийн мэдээллээр саналаа өгсөн сонгогчийн ирцээрээ сүүл мушгиж байсан ч үд дунд нэлээд идэвхижсэн бололтой хамгийн сүүлийн мэдээгээр ирц 57.89 хувь хүрчээ.

Ямартай ч улсын хэмжээнд сонгуулийн ирц хуульд заасан 50 хувийг давлаа.
Гэхдээ  гурван нэр дэвшигчийн хэн нэг нь нийт сонгогчийн 50 хувийн
саналыг аваагүй тохиолдолд сонгуулийг дахин зарлах юм.

Улсын бүртгэлийн ерөнхий газраас гаргасан мэдээгээр улсын хэмжээнд нийт 1.856.190 сонгогч бүртгэлд хамрагдсан. Сонгуулийн ерөнхий хорооноос саналаа өгсөн сонгогчийн ирц 57.73 хувьд хүрсэн тухай мэдээллийг өгөөд байгаа нь үндсэндээ 900 гаруй мянган сонгогч саналаа өгчээ хэмээн хэлж болохуйц байна. Хуульд зааснаар санал хураах ажиллагаа 22.00 цагт өндөрлөнө.

Ерөнхийлөгчийн сонгуулийн ирцийн мэдээллийг 19.00 цагийн байдлаар танилцуулъя.