Сонгуулийн Ерөнхий хорооноос Ерөнхийлөгчийн сонгуулийн явцын мэдээг танилцууллаа.

Хэнтий аймаг, Онон, Балжийн гол үертэй байгаа. Хөвсгөл аймагт мөн гол үерлэснээс болж нутгийн зарим иргэдийн хувьд саналаа өгөхөд бэрхшээл үүссэн байна. Онцгой байдлын Ерөнхий газраас иргэдийг гол гаргах ажлыг зохион байгуулж буй аж. Сонгуулийн ерөнхий хорооноос Онцгой байдлын газрынхантай хамтран ажиллахад бэлэн байгаагаа илэрхийлэн шаардлагатай тохиолдолд хөвөгч завь тээвэрлэн хүргэх зэрэгт тодорхой мөнгөний асуудлыг нь шийдэх боломжтойгоо илэрхийлсэн гэнэ. 

Иргэдийн дунд Ерөнхийлөгчийн сонгуульд оролцоогүй бол найман хувийн орон сууцны зээлд хамрагдах боломжгүй болж байна гэх мэт цуу үг явж байгаа, энэ нь үндэслэлтэй юу гэх сэтгүүлчийн асуултад  СЕХ-ны дарга Ч.Содномцэрэн “энэ мэт цуу яриа нь ор үндэслэлгүй мэдээлэл шүү” гэлээ.

15.00 цагийн байдлаар СЕХ-нд санал хураалттай холбоотой ямар нэг санал гомдол ирээгүй байгаа аж. Мөн үдээс өмнө цахилгааны хэлбэлзэл, нууц кодыг буруу хийсэнтэй холбоотой цөөн тохиолдолд санал тоолох машин гацаж, саатсанаас хойш дахин ийм асуудал гараагүй, бүх ажил хэвийн явж буй гэдгийг СЕХ-ноос онцлов.

Сонгуулийн машин нь бүхээгтэй болсон, сонгуульд оролцсон иргэдэд үлдэх ягаан хуудсыг Сонгуулийн штаб дээр нь хурааж авсан шалтгааныг тодруулахад СЕХ-ны дарга Ч.Содномцэрэн “Энэ жилээс санал тоолох машинд бүхээг хийсэн. Энэ нь саналын хуудсанд хэнийг дэмжсэн гэдэг нь машинд уншуулах үед бусдад харагдах боломжтой байна гэдэг гомдол гарсантай холбоотой. Харин санал өгсөн сонгогчдын бүртгэл болгож цагаан болон ягаан хуудасны аль нэгнийг авч үлдэж байгаа, үүнд асуудал байхгүй” гэсэн байна. 

Ерөнхийлөгчийн сонгуулийн ирцийн мэдээллийг танилцуулъя.

№	Аймаг, дүүрэг	10.00 цаг /хувиар/	15.00 цаг /хувиар/
ОРОН НУТАГТ:
1	Архангай	12,5	40,46
2	Баян-Өлгий	10,1	38,4
3	Баянхонгор	16,36	43,05
4	Булган	17,21	41,56
5	Говь-Алтай	19,25	46,39
6	Говьсүмбэр	21,95	47,29
7	Дорноговь	13,1	39,81
8	Дорнод	17,25	41
9	Дундговь	13,46	41,9
10	Завхан	19,82	51,7
11	Өвөрхангай	20,94	45,83
12	Өмнөговь	23,32	46,01
13	Сүхбаатар	16,84	49
14	Сэлэнгэ	16,4	40,07
15	Төв	17,88	42,47
16	Увс	16,02	46,9
17	Ховд	18,01	42,93
18	Хөвсгөл	14,32	42,54
19	Хэнтий	12,06	41,32
20	Дархан-Уул	20,53	43,73
21	Орхон	18,31	44,17
		16,74	43,32
НИЙСЛЭЛД:
22	Багануур	19,33	42,55
23	Багахангай	22,36	47,38
24	Баянгол	18,22	45,52
25	Баянзүрх	17,53	42,73
26	Налайх	19,32	42,92
27	Сонгинохайрхан	12,6	39,28
28	Сүхбаатар	15,53	44,44
29	Хан-Уул	17,74	44,32
30	Чингэлтэй	17,58	42,95
		16,45	42,77