Монголын арванбайт боулингийн холбооны 25 дахь удаагийн лигийн тэмцээн Үндэсний соёл амралтын хүрээлэнгийн боулинг төвд ганцаарчилсан төрлөөр зохиогдож дүнгээ гаргалаа. Эмэгтэйчүүдээс 1-р зэрэгтэй тоглогч Т.Дорждэрэм анх удаагаа лигийн аварга болсноор энэ нэр хүндтэй тэмцээнд 10 дахиа эхний гуравт шалгарав. Лигийн хошой аварга, 1-р зэрэгтэй тоглогч С.Хандаа/ТЭЦ-3/ тэргүүн тоглогчоос 4 оноогоор хоцорч, 4 дахь удаагаа үзүүрт шалгарсан байна. Харин энэ жилийн “Холбооны цом” болон зэрэггүй тоглогчдын цуврал тэмцээнүүдэд үзүүлсэн амжилтаараа боулингийн спортын 2-р зэргийн болзол биелүүлэн, зэргийн үнэмлэхээ гардсан Т.Долгормаа анх удаагаа шилдэг гурвын эгнээнд үлджээ.   

Эрэгтэйчүүдийн өрсөлдөөн сонирхолтой өрнөж, эцсийн мөчид ялагчаар 1-р зэрэгтэй тоглогч Ж.Содномдорж 6 тоглолтонд 168,66 дундаж оноо авсан амжилтаар тодорлоо. Тэрээр өмнө нь энэ тэмцээний хоёр, гуравдугаар байрт тус бүр 2 удаа орж байсан туршлагатай нэгэн. Удаах байрт өнгөрсөн оны 8-р сарын лигт гурвалж байсан, 2-р зэрэгтэй тоглогч Ц.Бямбасүрэн/Паркийн боулинг/ 166,66 дунджаар шалгарсан бол мөн 2-р зэрэгтэй тоглогч Н.Цэдэндамба 164,17 дундаж оноогоор сүүлийн 2 лигт дараалан, эхний байруудад багтаж чадлаа. Мөн 1-р зэрэгтэй тоглогч Сү.Батзориг, Цэнд.Батжаргал, 2-р зэрэгтэй тоглогч Н.Тамир нар 4-6-р байрыг эзлэв. Тэмцээнд Э.Энхбаясгалан, Уужимсанаа/МАК/ зэрэг шинэ залуу тоглогчид олноор оролцож, туршлагатай тоглогчдын арга барилаас суралцсан байна. Тэмцээнд хамгийн өндөр оноо авсан тоглогчид бол эрэгтэйчүүдээс Ж.Содномдорж /214/, эмэгтэйчүүдээс Т.Долгормаа /176/ нар юм. Тэмцээний үеэр зохиогдсон ур чадварын тэмцээнд Ж.Содномдорж мөн л түрүү байрын эзэн болсон бол Д.Мөнх-Амгалан 2-р байрт оржээ. Дараагийн тэмцээн 6-р сарын 30-ны ням гаригт 14:00 цагаас Паркийн боулинг төвд болох бөгөөд 7-р сарын Лигийн тэмцээн болон Зэрэггүй тоглогчдын гэсэн тэмцээнүүд нээлттэй зохиогдоно гэж Монголын арванбайт боулингийн холбооноос мэдээллээ.