“Hi-Fi records” хөгжмийн сүлжээ дэлгүүрээс долоо хоног тутамд гаргадаг шилдэг борлуулалттай цомгийн жагсаалтыг “Никитон”-ы “Үүлэн үүст” тэргүүлсээр байна. Уг цомог худалдаанд гарсан цагаасаа хойш тэргүүлэн өнөөдрийг хүртэл нэгд жагссаар байгаа юм. Арга  ч үгүй биз. Амьд хөгжим сонирхогч залуус, тэр дундаа “Никитон” хамтлагийн үнэнч фенүүдийн зургаан жил хүлээсэн энэ л шинэ цомгийн дуунуудаар энэ хавар, зуныхаа цангаагаа тайлан сэтгэлээ жаргаж байгаа. “Никитон”-ы Бачкагийн уран бүтээлүүдийг удтал үгүйлсэн фенүүд нь их хотын гудамжаар ганган хөлөгтөө “Тайз”, “Ахыгаа дэлхий дээр буулгаад аль”, “Шуурга”, “Baby”, “Зэмсэг”, “Үүлэн үст”, “Нар”, “Яагаа ч үгүй”, “Терминаль 12”, “Баяртай терминаль 12” хэмээх “Үүлэн үст”-ийн дуунуудыг эгшиглүүлэн яваатай олонтаа таарсан. Урлагийн цангаагаа тайлан буй тэдний хүсэл одоо ч шинэхэн хэвээрээ аж.

Зуны цангааг тань хөгжмийн хэмнэлээр тайлах “Hi-Fi records” жагсаалтын хоёрдугаарт “A Sound” хамтлагийн “Зуун наст” цомог орсон бол түүний араас Төрийн хошой соёрхолт, Ардын жүжигчин Н.Жанцанноровын “Бурхан халдун” цомог удаалжээ. Сонирхуулахад, уг цомог нь 2012 онд Монголын хөгжмийн зохиолчдын бүтээлээс анх удаа дэлхийн хөгжмийн зохиолчдын бүтээлийг хадгалах, хамгаалах, түгээх “Цахим” сүлжээнд худалдаалагдан Монголын хөгжмийн зохиолчдын бүтээл дэлхийн сонорыг мялаах их замын эхлэлийг тавьж байсан юм. Өнөөдөр түүний энэ л жимээр Монголын рок, поп, жааз, хөгжмийн олон бүтээлүүд дэлхийн цахим сүлжээгээр борлуулагдаж байгаа билээ.

Харин жагсаалтын дөрөвдүгээрт сонирхогчдын дунд эрэлттэйгээр өнөөдрийг хүртэл шилдгийн жагсаалтыг шил даран нэхсээр байгаа “Ертөнц” цомог оржээ. “Брос Рекордс”-ын тэнгэрийн өнгөтэй “Ертөнц” цомог тун удахгүй буюу ирэх долдугаар сарын 5-наас наймдугаар сарын 19-нийг хүртэл Монголын Хүүхдийн ордны бэсрэг танхимд “Universe Live” нэртэйгээ эгшиглэх юм. Харин тавдугаарт “Хурд” хамтлагийн гоцлол гитарчин, ая зохиогч  Д.Отгонбаярын “Чи минь байгаа болохоор” бие даасан тоглолтын DVD багтжээ. Тэрээр уг тоглолтынхоо эх бичлэгийг чанарын өндөр түвшинд DVD хэлбэрт буулган худалдаанд гаргаад байгаа юм.

Та зуны зугаатай өдрүүдийг дууны хэмнэлээр мэдрэхийг хүсвэл “Hi-Fi records”-ийг зориорой.

 
Өнгөрсөн долоо хоногт борлуулалтаараа тэргүүлсэн  “ТОП-10” цомгийн жагсаалтыг хүргэе.

№	Хамтлаг/Дуучин	Цомгийн нэр	Үнэ
1	Никитон	Үүлэн үст	55000
2	A Sound	Зуун наст	12000
3	Жанцанноров	Бурхан халдун	23000
4	Онон	Ертөнц	20000
5	Хурд	Чи минь байгаа болохоор DVD	30000
6	FM 98.5	2012оны шилдэг 20 дуу	15000
7	Язгуур таван хамтлаг	Язгуур таван хамтлаг DVD	29000
8	Балхжав	Миний дуунууд 2012	25000
9	Морин хуурын чуулга	Playing love	29000
10	Лхагвасүрэн	Тэнгэрлэг андууд	15000