Задгай агаарт хоёр өдрийн турш дуртай хөгжмөө сонсч, зүрхнээс булгилах эрх чөлөөгөө мэдэрмээр байна уу. Ийм боломжийг жилдээ нэг харамгүй хайрладаг “Playtime” наадам долдугаар сарын 27, 28–нд Гачууртын “Монгол шилтгээн”-нд нүргэлэх нь. 12 дахь жилдээ болж буй наадамд шинэ залуу болон урилгаар тоглох нийт 30 хамтлаг оролцох бөгөөд энэ жилийн наадам хамтлаг, дуучдын тоглолтын хувьд онцлог болох чимээ дуулдлаа. Урьдын жилүүдэд хамтлаг, дуучид цөөн хэдэн дуугаа дуулаад нэг хамтлагийн тоглох хугацаа дуусч, хөөрсөн сэтгэл гэгэлзсээр дуусдаг байсан бол энэ жил хугацааг нэмэх гэнэ. Өөрөөр хэлбэл, урилгаар оролцож буй хамтлагууд шинэ уран бүтээлээ танилцуулж, бүтэн “сэт” тоглох боломжтой боллоо. Ингэснээр мэдээж тоглолтын хугацаа сунгах юм.

Түүнчлэн жил бүр наадмын уламжлал ёсоор хөгжим сонирхогчдод зориулж “Монгол шилтгээн”-ийн задгай талбайд өнгө өнгийн майхан алаглах “Playtime Camp”, шар айргийн  хотхон байгуулж, амьд хөгжим сонирхогчдын эд хэрэгсэл, цомгийн цуглуулгыг худалдах зах ажиллах юм. Мэдээж эхний өдрийн шөнө болдог галын наадмыг яаж мартаж болохов.

Тоглолтын ерөнхий зохион байгуулагчаар “Hi Fi records”ажиллах бол наадамд тоглох хамтлагуудын бүртгэл эхэллээ. Тиймээс хамтлагууд зургадугаар сарын 25-наас өмнө “Hi Fi records”–т бүртгүүлэх буюу 333-111 дугаарын утаснаас дэлгэрэнгүй мэдээллийг авах боломжтой.  Наадмын эргэн тойрон дахь бэлтгэл ажлын тухай бид эргэн мэдээллэх болно.

Нийслэлээс гачуурт тийш хөдлөх хөгжимчдийн цуваа тун удахгүй…