Попын гүнж өргөмжлөлт Бритни Спирс “Ooh La La” нэртэй шинэ синглээ цацлаа. Бритнигийн “Ooh La La” гэх цоглог хэмнэлтэй шинэ дуу нь хэдийнэ үзэгчдийн хайртай баатар болсон бяцхан цэнхэр смурфчуудын тухай өгүүлдэг хөгжилтэй явдлуудаар дүүрэн “The Smurfs 2” анимейшн киноны дуу аж. Өдгөө 31 настай поп од маань “Ooh La La” синглээ өчигдөр анх удаа Америкийн “KIIS FM”-ээр албан ёсоор цацаж, шүтэн бишрэгчдийнхээ сонорт хүргэжээ.

Бритни Спирс одоогоор найм дахь цомгоо бэлэн болгохоор дуу бичлэгийн ажилдаа ороод байгаа ба шинэ цомог энэ жилийн эцсээр сонсогчдын гарт очих гэнэ. Бяцхан нууц задлахад Бритни шинэ цомогтоо зориулан “Black eyed peas” хамтлагийн дуучин “will.i.am”-тай хамтран дахин шинэ уран бүтээл гаргахаар төлөвлөжээ. 

“The Smurfs 2” киноны хувьд ирэх долдугаар сарын 31-нд АНУ-д нээлтээ хийх бөгөөд бяцхан смурфчуудын дуу оруулгын багт дуучин Кэти Перри, телевизийн хөтлөгч Марио Лопез зэрэг алдартнууд багтсан гэнэ.