Дансандаа сая, сая ам.доллартай сайд асны эхнэрийн тухай дуулиан намжаагүй байна. Зөвхөн энэ хэрэгтэй хол­боотойгоор цагдаа,  мөр­дөнгийнхөн хэд хэ­дэн удаа хэвлэлийнх­нийг цуглуулаад амж­лаа. Ё.Отгонбаяр ги­шүүний эхнэр О.Эр­дэнэ­солонго данс­наасаа 300 гаруй сая ам.дол­лар бас 13.9 тэр­бум төгрөгийн гүйл­гээг дөрвөн жилийн дотор хийсэн гэсэн мэдээллийг хуулийнхан дахин, дахин  “Үнэн” гэж байна.

Харин хэрэгт хол­богдогч О.Эрдэнэсолонго болоод Ё.Отгонбаяр сайд 300 сая төгрөгийг доллар хэмээн андуурсан гэсэн мэдэгдэл  хийж, ийм их мөнгө амьдралдаа барьж үзээгүй гэжээ. Чухамдаа бол 300 га­руй сая ам.доллар бас 13.9 тэрбум төгрөг гэдэг маш их, толгой эргэм том мөнгө. Манайд үйл ажил­лагаа явуулдаг арил­жаа­ны хоёроос, гурван банк­ны валютын  нөөц бо­лохуйц долларыг ганц хүний дансанд төв­лөрүүлнэ, дамжуулна  гэ­дэг байж боломгүй мэт асуудал юм. Энэ хэрэгтэй холбогдуулан  Ё.Отгонбаярын эхнэр  О.Эрдэнэсолонгыг барьж хорьсон ч мэдээж  энэ нь сайд асантай  холбоотойгоор эхэлсэн байж таарна. Үүнийг ч  өнгөрсөн долоо хоногт  хэвлэлийнхэнд хандсан  Улсын мөрдөн байцаах газрынхан мэдэгдлээ.  Гэхдээ тэдний ярьсан шиг  Налайх дүүрэгт барилга  барьсан иргэнээс 280 сая төгрөг нэхэж, бусдыг дээрэмдсэн гэх хэргээр бус нийслэлийн Хан-Уул дүүргийн нутагт байрлах Богдын музейн эзэмшил газ­раас АПУ-гийн охин компаниудад хууль  бусаар шилжүүлсэн байж болох хэргийн үзүүр түү­ний эхнэрийн нууц дан­сан дахь мөнгийг ил­рүү­лэх учиг нь болж  өгчээ.

Үйл явдал нэлээд хэ­дэн жилийн өмнөөс эх­лэлтэй юм. Сар хүрэхгүй хугацааны өмнө манай со­нинд Богд хааны  ор­дон музейн захирал  О.Мэнд­сайхан  ярилцлага өгөх­дөө “Одоо ч газрын асуу­дал явж байгаа. Олон асуу­дал бий. 2001 онд Зас­гийн газар хэд хэдэн га­зар хамгаалалтын бүс тогтоосон. “Ван трейд” ком­пани хамгаалалтын бүс тогтоохоос өмнө хоёр байшин барьчихсан байдаг. Хамгаалалтын бү­сийг хамгаалахгүй бай­гаад бид асуудал тавь­даг. Өнгөрсөн на­мар Ц.Оюунгэрэл сайд ирж танилцаад хол­бог­дох газарт албан би­чиг явуулсан. Нэг сонир­холтой зүйл бол “Ван трейд” компани 1.6 га га­зарт тохижуулалт хий­нэ гэчихээд түүнээсээ хэсэгчлэн “Интернэшнл медика сентер” компанид шилжүүлсэн байдаг. Энэ мэтээр газраа гуравдагч, дөрөвдөгч этгээдэд шил­жүүлэх байдал анзаа­рагдаж байгаа юм. “Номун гэрэл” төв  гэхэд л газраа томсгоод хамгаалалтын бүсийн газраас авчихсан. Энэ асуудлыг салбарын яамнаас хөөцөлдөнө гэсэн. Цаашид барилга байшин барих бус но­гоон зүлэгжүүлэлт хийг­дэх төлөв хотын ерөн­хий төлөвлөгөөнд орсон байгаа” гэж ярьсан. Түү­ний хэлсэнч­лэн  Богдын музейн ойр орчмын нийтийн эзэмш­лийн газар руу “Ван трейд”, “Грийн эйр гарден”, “Интернэйшнл медикал сентер” зэрэг компаниуд  нийслэлээс, БСШУ-ы  сайдаас зөвшөөрөлтэй  гэх үндэслэлээр халдсан  байдаг юм билээ.  Хэдийгээр өөр, өөр нэртэй олон компани мэт боловч эдгээр нь бүгд зүсээ хувилгасан л болохоос АПУ компаниас салбарласан “охин”-ууд  нь гэдгийг УИХ-ын гишүүн Г.Батхүүгийн хөрөнгө орлогын мэдүүлгээс харж болно.

Үндсэндээ АПУ компанийнхан Хан-Уул дүүрэгт маш олон газрыг хууль бусаар авсан байдаг аж. Тэд тэнэг биш болохоор өөр, өөр охин компанийнхаа нэрээр энэ ажлаа гүйцэлдүүлдэг гэдгийг дээр дурьдсан. “Ван трейд” бол Богдын  музейн ойр орчмын  нийтийн эзэмшлийн 5.6 га газрын 1.6-г нь эзэмшиж тэндээ пивоны үйлдвэр барин ашиглалтад оруулж, бас зуны цагт Богдын музейн баруунтаа мянга орчим хүнийг нэг дор цуглуулах боломж бүхий томоохон задгай уушийн газрыг ажиллуулж дөнгөсөн юм. Сүүлд авсан мэдээллээр “Интернэйшнл медикал  сентер” гэдэг  компанийн нэрээр авсан 1322 метр квадрат газрынхаа ойролцоо өөрсдийн мэдлийн эмнэлэг барихаар хөөцөлдөж байгаа гэнэ лээ. Харин “Грийн эйр гарден” гэх нэрээр соёлын өвийн хамгаалалтын газарт зочид буудал барихаар ажлаа  эхэлсэн ч музейнхний эсэргүүцэлтэй тулаад чадаагүй ажээ. Уншигчиддаа  ойлгомжтой болгоход тэд Богдын музейн хашаан доторх газар руу огт халдаагүй, харин нийслэл эзэмшилдээ авсан ойр орчмынх нь олон нийтийн эзэмшлийн талбайг хүч түрэмгийлэн авч байгаа  юм. Ингэснээр  түүхийн дурсгалт газар өндөр барилгаар хавчигдан бүслэгдэж, улмаар устах аюулд ирээд буй ажээ. Мэдээж тэднийг ингэж дураараа дургих боломжийг нь олгосон эрх мэдэлтэн цаана нь бий. Энэ эрх мэдэлтнүүдийн  нэг нь Ё.Отгонбаяр байсан учраас түүний эхнэр олон сая долларын хэрэгт холбоотой гэж үзэх сэжүүр болсон байж магадгүй ажээ.

Өөрөөр хэлбэл, Ё.Отгонбаяр  Боловсрол соёл, шинжлэх ухааны сайд байхдаа Богдын музейн эзэмшил дэх ойр орчмын газар нь түүх, соёлын дурсгалт газраас тусдаа гэсэн агуулгатай албан бичиг хийж өгсөн байж болох талтай юм. Ингэж үзэх үндэслэл нь тэрээр 2012 оны тавдугаар сарын  03-ны өдрийн 1а/2642  дугаартай албан бичгээрээ “Грийн эйр гарден”-д газар олгосон  шийдвэрийг цуцлаж өгөхийг Нийслэлийн Засаг дарга Г.Мөнхбаярт хандан илгээж, үүнийх нь дагуу газар эзэмших  гэрчилгээг нь хүчингүй болгож байжээ. Хачирхалтай  нь  архиваас газар эзэмших гэрчилгээг хүчингүй болгох албан бичиг олдож байгаа ч зөвшөөрөл олгосон нь олдохгүй байгаа юм. Мөн Богдын музейн захиргааныхан одоогоос жил орчмын өмнө сайд  Ё.Отгонбаярыг АПУ-гийн охин  компани  болох “Ван трейд”-ээс авилга авч, газрын зөвшөөрөл олгоход нь тусласан гэх үндэслэлээр Авлигатай тэмцэх газарт өгсөн  байдаг юм. Түүнийх нь хариуг тус газрынхан өгөхгүй байсаар одоо л шалгах ажлаа эхэлж  байгаа нь энэ бололтой. Музейн ажилчид Ё.Отгонбаяртай хамт тухайн үед Нийслэлийн Засаг дарга байсан, газрын зөвшөөрөл олго­сон Г.Мөнхбаяр энэ хэр­гүүдэд холбоотой  гэж үздэг юм билээ. Харин АПУ-гаас авлига авсан байж болзошгүй гэх үндэслэлээр Ё.Отгонбаярыг шалгах явцад түүний эхнэрийнх нь дансуудад их хэмжээний мөнгө эргэлдсэн нь илэрч, хэргийн учиг цаашид тайлагдах дөхсөн байж болох юм.

 Хэрэг явдал цаашид ийнхүү гүнзгийрвэл АПУ компанийн удирдлагууд ч бусдад их хэмжээний  авлига өгсөн гэх хэргээр Авлигатай тэмцэх газарт  байцаагдаж мэднэ гэдгийг  эх сурвалж дуулгалаа. УИХ-ын гишүүний эхнэрийн дансанд хаа нэгтэйгээс орж, хаа нэгтээ гарсан их хэмжээний мөнгөний учиг нь АПУ-гаас тай­лагдаж мэдэх нь. Сог­туу­руулах ундааны хуулийг байнга зөрчиж, Хан-Уулд хаанчлалаа тог­тоогоод буй АПУ ком­панийн удирд­лагуудтай  холбоотой байж мэдэх  хам­гийн оновчтой гар­гал­гааг хуулийнхан ямар бо­ловч гаргачихсан суу­гаа бололтой. Манай сур­валжлагчийн “АПУ ком­пани газар авчихаад бай­гаа юм биш үү, танай хамгаалалтын бүсэд” хэмээх асуултад “Бичиг баримт дээр АПУ гэсэн нэр байдаггүй. Хэвлэл, мэдээллийн хэрэгслээр тэгж ярьж, бичээд бай­даг юм. Үндэс­лэлтэй болоод бичдэг байх” хэмээн ха­риулж байсан юм.