“Их засаг” олон улсын их сургуулийн оюутнууд үнэхээр азтай залуус аж. Учир нь тус сургуулиас зохион байгуулдаг “Super student-2” реалити шоу төслийн энэ жилийн  ялагч АНУ-д суралцах бөгөөд сургалт, байрны төлбөрөөс 100 хувь чөлөөлөгдөх онцгой боломжийн эзэн болж байгаа юм.

“Их засаг”-чууд өнгөрсөн долоо хоногт 2012-2013 оны хичээлийн жилийн “Шилдэг оюутан-2” төслийн хаалтын ажиллагаа, гала тоглолтыг “Гайхамшигт мөрөөдлийн аялал” нэртэйгээр МҮЭСТО-д нүсэр хийсэн юм. Энэ үеэр ялагчдаа тодруулж, гадаадад сургах тэтгэлгийг нь гардуулж, гайхамшигт мөрөөдлийнх нь аялалд хөтөллөө. “Шилдэг оюутан” шоу нь бусад реалити тэмцээнүүдээс зорилго,  агуулгын хувьд тэс өөр. Тиймдээ ч өнгө гэрэл алагласан биш энгийн хэрнээ даруухан ч шагналын сангийн хувьд ямар ч шоутай харьцуулшгүй их, бодит гэдгээрээ онцлог. 15 оюуныг гадаадын их, дээд сургуульд  100 хувь үнэ төлбөргүй сургана гэдэг мөнгөөр хэмжигдэж болох ч мөнгөнөөс үнэ цэнэтэй боловсрол гэх зүйлсийг оюутнуудад бэлэглэж байгаараа залууст оюуны хөрөнгө оруулалт хийж буй  гайхалтай реалити шоу.

Шоуны тэргүүн байрт Хөгжим, бүжгийн коллежийг мэргэжлийн хөгжимчин мэргэжлээр төгссөн одоо Монголын “Рояал” академи, “Рояал” олон улсын дээд сургуулийн Бизнесийн удирдлагын хоёрдугаар дамжаанд суралцдаг  А.Ундармаа шалгарч, АНУ-ын Колорадо Хайт сургуульд 100 хувь сургалтын төлбөр болон амьдрах байрны тэтгэлгээр шагнуулж, эрх чөлөөний өлгий нутаг руу  явахаар боллоо. Шилдэг 10-т шалгарсан бүх оюутнууд 100 хувийн тэтгэлэг авч байгаа бөгөөд  “Чингис-Соосэ” сургуулийн оюутан  Б.Тэмүүлэн, Э.Ихбаяр, Хууль зүйн сургуулийн оюутан Д.Айсауле нар Арлын Японы, Акитагийн их сургуульд  Эдийн засгийн сургуулийн Б.Энхтөгс,  Аялал жуулчлалын сургуулийн Ж.Цэдэн-Очир нар БНСУ-ын Канвоны үндэсний их сургууль, Эдийн засгийн сургуулийн Д.Пүрэвмаа, “Рояал” академийн Х.Ариунтунгалаг нар мөн тус улсын Алс дорнодын их сургуульд тус тус явахаар болсон бөгөөд Мөн Нам Сөүл, Тонгёоны их сургууль, Кипр улсийн Касагийн их сургуулиудад шилдэг оюутнууд 100 хувь тэтгэлэгтэй суралцахаар болжээ.

Энэ тэмцээнд оролцсон оюутнууд өөрийгөө хөгжүүлэх, шинэ зүйлсийг бүтээж, гадаад хэлний мэдлэгээ сайжруулах, нийгмийн өмнө хариуцлага хүлээх гээд үр өгөөжтэй олон сургалт дамжаа, уралдаан тэмцээн, аянд хамрагдах гэнэ.

Тиймээс ирэх хичээлийн жилд үргэлжлэх “Super student-3” шоуг “Их засаг”, “Рояал” академийн шинэхэн оюутнууд, боломжийг алдахыг хүсдэггүй залуус тэсэн ядан хүлээсээр байгаа аж. Үнэхээр л “Их засаг”-т суралцаж байгаа залуус аз жаргалын гүүрэн дээр алхаж байгаа азтай хүмүүс юм.