Энэ сарын 3-ны өдөр их спортоос зодог тайлж байгаагаа албан ёсоор мэдэгдсэн Жейсон Кидд ирэх улирлаас эхлэн “Бруклин Нэтс” багийг дасгалжуулахаар боллоо. Түүнд баг дасгалжуулах саналыг Оросын тэрбумтан Прохоров тавьсан тухай мэдээллийн сайтууд мэдээлж байна. “Би энэ багт гайхалтай долоон жилийг үдсэн. Одоо харин дасгалжуулагчийн дүрээр ирж байгаадаа баяртай байна. Дасгалжуулна гэдэг бол үнэхээр хариуцлагатай бөгөөд нэр хүндтэй ажил. Сагсанбөмбөгийн талбайд холбон тоглогч гэдэг бол дасгалжуулагчтай адил үүргийг гүйцэтгэдэг. Бруклин баг бол плей-оффын баг. Бүсийн аваргын төлөө ч гарч ирэх хүчтэй баг. Ямар ч байсан амжилт гаргахын төлөө ажиллана” гэж Жейсон Кидд ярьжээ. 1994 оны драфтын хоёр дахь сонголтоор “Даллас Маверикс” багт ирж байсан тэрээр бүх оддын тоглолтод 10 удаа сонгогдож, NBA-ын аваргаар нэг удаа, АНУ-ын шигшээ багтай хамт 2000, 2008 оны олимпиос алтан медаль хүртэж байсан нэгэн билээ. Тэрээр “Бруклин Нэтс”-ийг дасгалжуулах болсноор NBA-ын түүхэнд зодог тайлсан анхны улиралдаа баг дасгалжуулсан гурав дахь хүнээр тодроод байгаа юм.