Орон сууцны ипотекийн зээлийн хүүг +-8 хувиар үргэлжлүүлэх боломжтой болсныг өнгөрсөн долоо хоногт Ерөнхий сайд Н.Алтанхуяг, Монголбанкны ерөнхийлөгч Н.Золжаргал нар мэдэгдсэнээс хойш нийгмийн дунд гол сэдэв энэ болоод байна. Хуучин зээлдэгч нарын хувьд хамгийн их баяртай хүлээн авсан бол шинээр зээл авахыг хүсэгчид яаж 30 хувийн урьдчилгаа төлбөрөө олох вэ хэмээн хэлэлцэж эхэлжээ. Айл гэр болоод нийтийн тээврийн унаанд хүртэл хүмүүс энэ л сэдвээр ярилцаж байна. Зарим нь найман хувийн зээл зургаан хувийнхтай нэг адил сонгуулийн шоу гэх нь байна. Тэгвэл энэхүү эргэлзээг нэг мөр цэглэсэн явдал яг одоо Худалдаа хөгжлийн банкны төв байрын үүдэнд өрнөж байна. “Орон сууцны найман хувийн зээлийн нээлтийн ёслол”-д Ерөнхий сайд Н.Алтанхуяг оролцож “Найман хувийн зээл бол сонгуулийн шоу биш гэдгийг энэ ёслол батална. Бид бага ярьж их хийхийг зорьж байгаа. Энэ ч үүднээс олон сар судалсны эцэст бүх ипотекийн зээлийг найман хувьд шилуүүллээ. Бүх монгол хүмүүсийг хүний анхдагч хэрэгцээ болсон орон сууцаар хангахын төлөө бид ажиллана” хэмээн хэллээ.

Эдийн засгийн хөгжлийн сайд Н.Батбаяр:

-Энэ бол Монгол Улсын эдийн засгийн хөгжлийн илэрхийлэл гэж болно. Өнгөрсөн 20 жилийн хугацаанд 20 хувьд дөхөөд байсан ипотекийн зээлийн хүүг нэг оронтой тоонд шилжүүлж чадлаа. Мөнгө гэдэг бол хүний бүтээл. Мөнгө баялгийг бүтээхгүй, хүн мөнгийг бүтээнэ. Гэтэл хүн мөнгөнийхөө эрхшээлд байна. Үүнийг өөрчлөх эхлэл нь найман хувийн ипотекийн зээл юм гэлээ.

Худалдаа хөгжлийн банкны гүйцэтгэх захирал Б.Мэдрээ:

-Өнөөдөр манай банк нийтдээ 258 тэрбум төгрөгийн ипотекийн зээл олгоод байна. Нийт ипотекийн зах зээлийн 20 гаруй хувийг эзэлж буй банкны хувьд бид энэхүү зээлийн хөтөблөрийг амжилттай хэрэгжинэ гэдэгт итгэлтэй байна гэлээ.

Хүмүүсийн дунд хүчтэй оршсоор байгаа гайхашрал, эргэлзээг арилгахын тулд арилжааны банкууд ипотекийн зээл авсан бүх хүмүүст холбогдон зээлийн шинэ журмын талаар мэдээлэл өгч эхэлжээ. Одоогийн байдлаар нийт 14 арилжааны банкаас Тээвэр хөгжлийн банк, Кредит банк энэхүү хөтөлбөрийн дагуу найман хувийн зээл олгохгүй гэдгээ мэдэгджээ. Эдгээр банкууд нь урьд өмнө энэ төрлийн зээл олгож байгаагүй бөгөөд бусад банкуудын хувьд өмнөх туршлагадаа тулгуурлан ипотекийн зээлийг найман хувиар олгох боломжтой гэдгээ мэдэгджээ.

Шинээр зээлдэгчдийн тухайд урьдчилгаа төлбөр 30 хувь нь хэт өндөр байна гэсэн гомдлыг 1111 тоот утсанд ирүүлсэн байна. Гэвч эхний удаа хөтөлбөр 30 хувиар хэрэгжинэ гэдгийг Монголбанкнаас мэдэгдэж байна.