Ашигт малтмалын газар /АМГ/-ын дарга асан Д.Батхуяг нарын дөрвөн хүнд холбогдох хэргийн хяналтын шатны шүүх хурал энэ сарын 19-нд Улсын дээд шүүхэд болно. Тодруулбал, Ашигт малтмалын газар /АМГ/-ын дарга асан Д.Батхуяг, тус газрын Геологи, уул уурхайн кадастрын дарга Т.Даваацогт, Д.Батхуягийн найз, “Зэлэм” компанийн захирал н.Жаргалсайхан, Н.Бат-Ирээдүй нарыг эрх мэдлээ урвуулан ашиглаж, нийт 106 лиценз хууль бусаар тарааж, завшсан хэрэгт анхан болон давж заалдах шатны шүүхээс буруутгаад байгаа.

Анхан шатны шүүхээс Д.Батхуягт 6,6 жил, Т.Даваацогтод зургаа, харин н.Жаргалсайхан, н.Бат-Ирээдүй нар тус тус 5,1 жилийн хорих ял оноогоод байсан юм. Харин өнгөрсөн дөрөвдүгээр сард болсон давж заалдах шатны шүүхээс тэдэнд оноосон ялыг хөнгөрүүлж, Д.Батхуяг, Т.Даваацогт нарт тус бүр дөрвөн жил, н.Жаргалсайхан, н.Бат-Ирээдүй нарт 3.6 жилийн ял оноосон байдаг. Мөн Д.Батхуяг нарын эрх мэдлээ урвуулан ашиглаж, “тараасан” 106 лицензийн зөвшөөрлийг цуцалж, төрийн мэдэлд шилжүүлэх тухай анхан шатны шүүхийн шийдвэрийг хэвээр баталсан юм.