Хайрыг магтан дуулаагүй, энэ талаар шүлэглээгүй яруу найрагч энэ орчлонд нэгээхэн ч үгүй. Тэгвэл Монголын Зохиолчдын эвлэлийн дэргэдэх “Залуу зохиолчдын нэгдэл”-ээс санаачлан МЗЭ, “Хязгааргүй дуулал” ТББ-тай хамтран яруу найргийн чөлөөт уншлага зохион байгуулахаар болжээ. Тус өдөрлөг нь “Өргөн орчлонд хүн хайраар дутаж болохгүй” уриан дор энэ сарын 30-нд Үндэсний цэцэрлэгт хүрээлэнд болох юм. Тус уншлагын зорилго нь “Нийгэм, хүн төрөлхтөний оюун санаанд сайн сайхныг даллан дуудагч хайрын үнэ цэнийг хүүхэд залууст ойлгуулах түүгээр дамжуулан хүний сэтгэлд гэрэл гэгээ бэлэглэх” гэдгийг ЗЗН-ийн гүйцэтгэх захирал, Г.Сэр-Одын нэрэмжит шагналт яруу найрагч Ч.Ууганбаяр хэлж байлаа. Энэхүү задгай уншлага нь үзэгч, сонсогчдод үнэ төлбөргүй болох бөгөөд уншлагад Ардын уран зохиолч, Төрийн шагналт ахмад яруу найрагчаас эхлээд шинээр шүлэг бичиж эхэлж байгаа залуусыг оролцуулсан зуун уран бүтээлч оролцох ажээ.