Тайландын Пукет хотын "Indoor Sports Complex"-т чөлөөт бөхийн Азийн залуучуудын аварга шалгаруулах тэмцээн зургаадугаар сарын 13-16-ны өдрүүдэд болж байна. Тэмцээнд БНАСАУ, БНСУ, БНХАУ, Япон, Вьетнам, Индонези, Ирак, Иран, Казахстан, Монгол, Тайланд, Филиппин, Энэтхэг зэрэг 19 орны залуу бөхчүүд зодоглож байна.

Монголын баг эрэгтэй, эмэгтэй тус бүр найман жинд оролцож байгаагаас тэмцээний эхний өдөр Монголын гурван бөх дэвжээнд гарснаас эмэгтэйчүүдийн 59 кг-д Э.Гантуяа мөнгөн медаль хүртлээ. Э.Гантуяагийн жинд есөн бөх зодоглосноос нэгдүгээр тойрогт хийлж, хоёрдугаар тойрогт БНСУ-ын бөх Веон Жн Квоныг 6:0, 0:0, улмаар Казахстаны Аяулым Касымоваг 2:0, 5:0-оор ялснаар мөнгөн медалийн болзол хангажээ. Азийн аваргын төлөө Киргизийн бөх Айсулу Тюнебековад 0:6, 0:2-оор дийлдсэн байна. Гавьяат дасгалжуулагч З.Дүвчингийн удирдлага дор “Замчин” спорт клубт бэлтгэл сургуулилалтаа хийдэг Э.Гантуяагийн хувьд өнгөрсөн жил Ази тивийн өсвөр үеийн АШТ-ээс 56 кг-д хүрэл медаль хүртэж байжээ.

Мөн бусад хоёр бөхийн тухайд эмэгтэйчүүдийн 44 кг-д Г.Мөнхцэцэг наймдугаар, 51 кг-д Б.Мөнхтуяа долдугаар байрыг эзэлсэн байна. 

Өнөөдөр эмэгтэй 48, 55, 63, 72 кг, эрэгтэй 50, 120 кг-ийн жингийн барилдаан болно.