ИНЕГ-ын С.Батмөнхийн хэргийг хэрэгсэхгүй болгожээ

Иргэний нисэхийн ерөнхий газрын дарга асан С.Батмөнхийн төсвийн хөрөнгийг хууль бусаар захиран зарцуулсан гэх хэргийг өнгөрсөн оноос эхлэн Авлигатай тэмцэх газарт шалгаж байсан. Мөрдөн байцаалтын явц болоод түүнийг буруутгаж буй хэргүүдийн талаар АТГ-ын Мөрдөн байцаах албаны дарга Э.Амарбатаас тодрууллаа.

-ИНЕГ-ын экс даргын хэрэг шийдэгдэх дөхөж байгаа юу?

-С.Батмөнхийн хэргийг Нийслэлийн прокурорын газраас хэрэгсэхгүй болгосон байгаа.

-Ямар шалтгаанаар хэрэгсэхгүй болгосон юм бол?

-ИНЕГ-ын даргаар ажиллаж байх хугацаандаа тухайн үеийн Зам, тээвэр, барилга, хот байгуулалтын яамны зарим албан хаагчдад орон сууцны дэмжлэг үзүүлсэн хөрөнгийг зориулалтын бусаар зарцуулсан, хамааралгүй компанийн ажилчдыг дэмжсэн эсэхийг шалгаж байсан. Харин прокуророос учирсан хохирол байхгүй, эрүүгийн хэрэг үүсгэх үндсэлэлгүй гэж хэрэгсэхгүй болгосон.

Д.ЖАРГАЛ