Маркос Сенна Америкийн Нью Иорк Космос багт карьераа үргэлжлүүлэх боллоо. 37 настай тэрээр 2002 оноос хойш Вильяреал багийн төлөө хүчин зүтгэж байсан юм. Одоогоос 2 улирлын өмнө Вильяреалыг доод лиг рүү унахад Сенна багтаа үнэнч үлдэж тэднийг дахин Ла лигт дэвшихэд тусалсан юм. Сенна 2008 оны Европын аваргад Испаний шигшээ багтай хамт түрүүлж тэмцээний шилдэг багт багтаж байсан.

Пеп Гуардиола Байерн дахь бэлтгэл ажлаа үргэлжлүүлсээр байна. Тэрээр саяхан Шальке багт ажиллаж байсан видео аналист Ларс Корнетка багтаа авчирсан байна.

Корнетка тоглолтын завсарлагаанаар видео анализ хийхээс гадна тоглолтын өмнөх бэлтгэл ажил, тактикийн зөвлөгөө өгөхөд тусалдаг юм.

Пеп Барсад ажиллаж байхдаа видео анализ дээр онцгой анхаарал хандуулдаг байсан бөгөөд түүний амжилтын бас нэг шалтгаан нь үүнд байгаа хэмээн мэргэжилтнүүд үздэг юм.

Сери А лигийн Болонья клуб Панажиотис Конег албан ёсоор өөрсдийн тоглогч болголоо. Тэд Грек тоглогчын төлөө 1.6 сая еврог Брешиад төлсөн байна. Өнгөрсөн улирлыг Коне Болоньяд зээлээр өнгөрүүлсэн бөгөөд тун сайн тоглож, улирлын шилдэг гоолыг оруулсан юм. 25 настай тэрээр өмнөх улиралд Болоньягийн төлөө 35 тоглолтонд 7 гоол оруулсан юм.

Астон Вилла 2 шинэ тоглогчтой боллоо. Тэд Данийн Норшелланнд багаас хамгаалагч Жорес Окорег авчирсан бол Нидерландын Гронинген багаас Леандро Бакунаг өөрийн эгнээнд нэгтгэсэн.

Ердөө 20, 21 настай эдгээр залуус тус тусын лигтээ түрүүлж үзсэн бөгөөд шигшээ багтаа дуудагдаад амжсан юм.