УИХ-ын гишүүдийн ихэнх нь Ерөнхийлөгчийн сонгууль гээд орон нутгийг зорьжээ. Гишүүд эзгүй хойгуур хуралдаж буй Байнгын хорооны хуралдаанд МАН-ын цөөн хэдэн гишүүн харагдах болж. Тухайлбал, өнөөдөр хуралдсан Нийгмийн бодлого боловсрол, соёл, шинжлэх ухаан /НББСШУ/-ы байнгын хорооны хуралдаан гишүүдийн ирц хүрээгүйгээс маргааш болж хойшиллоо. Тус байнгын хорооны дарга З.Баянсэлэнгэ ч мөн хөдөө томилолттой яваа юм байна.  Байнгын хорооны даргаасаа эхлээд 23 гишүүнээс ердөө зургаан гишүүн л өнөөдрийн хуралдаанд ирсэн юм.

Нийгмийн бодлого боловсрол, соёл, шинжлэх ухаан Иргэний эрүүл мэндийн даатгалын сангийн санхүүжилтийг шалгаж, санал, дүгнэлт гаргах, шийдвэрийн төсөл боловсруулах үүрэг бүхий ажлын хэсгийн тайланг сонсох байв. Энэ хуулийн төсөл УИХ-ын чуулганы хуралдаанаар хэлэлцэж буй чухал төслүүдийн нэг байтал байнгын хорооны хуралдаанаар хэлэлцэх боломж олдохоо байлаа. Эсвэл ингэж сонгуульд анхаарлаа хандуулж, ирц хүрсэн, хүрээгүй хуралдаж байхаар нэг мөсөн УИХ-ын чуулганыг завсарлуулчихвал яасан юм бэ, З.Энхболд дарга аа.