Францын нийслэл Парис хотноо оны хоёрдахь “Их дуулга” болох “Roland Garros” буюу “Францын нээлттэй тэмцээн” найм дахь өдрөө үргэлжиж байна. Тэмцээний ганцаарчилсан төрлийн дөрөвдүгээр тойргийн тоглолт эхэлж, шигшээ наймд өрсөлдөх теннисчид тодроод байна.

Дэлхийн чансааг тэргүүлэгч АНУ-ын Серена Уильямс Италийн Роберта Винчиг 6:1, 6:3-аар, ОХУ-ын Светлана Кузнецова наймд эрэмбэтэй Германы Анжелия Керберийг 6:4, 4:6, 6:3-ийн харьцаагаар буулган авснаар шигшээ наймд шалгарлаа. “Их дуулга”-ын 15 түрүүт, дэлхийн манлай теннисчин АНУ-ын Серена Уильямсын дараагийн учраа “Roland Garros”-д 2009 онд тэргүүлсэн ОХУ-ын Светлана Кузнецова юм. Хойд хөршийн шилдгүүдээс өнөө шөнө Мария Шарапова, Мария Кириленко нарын шилдгүүд учраа буулгах аваас шөвгийн наймд шалгарах учиртай.

Тэмцээний дөрөвт эрэмбэтэй Польшийн Агнешка Радваньска, өнгөрсөн жилийн тус тэмцээний дэд аварга Италийн Сара Эррина нарын шилдгүүд хагас шигшээд шалгараад буй. Итали бүсгүй Сара Эррина ганцаарчилсан төрлөөс гадна хосын төрөлд ч шилдэг тоглолтуудыг үзүүлдэг. Тэрбээр нутаг нэгт Роберта Винчитэй хосын төрлийг тэргүүлэн тоглож буй бөгөөд тэдний хувьд хоёрдугаар тойрогт Францын хосуудтай учраа таарчээ. Итали бүсгүйчүүдийн хувьд хосын төрлийн анхны "Их дуулга"-аа өнгөрсөн жил "Roland Garros"-т түрүүлж авсан бөгөөд улмаар "Америкийн нээлттэй тэмцээн"-д дахин тэргүүлжээ. Тэд оны гарсаар "Австралийн нээлттэй тэмцээн"-нд түрүүлээд байгаа.

Эмэгтэйчүүдийн ганцаарчилсан төрлийн нөгөө хэсгээс оны анхны “Их дуулга” болох “Австралийн нээлттэй тэмцээн”-нд түрүүлсэн, гуравт эрэмбэй Беларусын Виктория Азаренка шөвгийн наймд шалгараад байна. Тэрбээр шөвгийн наймд шалгарахын тулд 2010 оны тус тэмцээний аварга Францын Франциско Скьявонег 6:3, 6:0-ийн харьцаагаар буулган авчээ.

Эрчүүдийн хувьд шөвгийн наймд Швейцарийн Рожер Федерер, Францын Жо Уильфред Цонга нарын шилгүүд шалгараад байгаа бөгөөд тэд шөвгийн наймд учраа таарсан. Мөн дэлхийн манлай теннисчин Себрийн Новак Жокович, 12-т эрэмбэтэй Германы Томм Хаас нар учраагаа буулган авснаар шөвгийн наймд шалгараад байна.

Энэ цагт Испаний Рафаэль Надаль, Японы тэргүүн теннисчин, тэмцээний 13-т эрэмбэтэй Кей Нишикори нарын тоглолт болж байна.