NBA-ын дорнод бүсээс плей-оффын шатанд гуравдугаар байраар шалгарсан “Индиана Пейсэрс”, өнгөрсөн жилийн аварга “Майами Хит” багтай хийж байгаа бүсийн аварга шалгаруулах өрсөлдөөний цувралыг тэнцүүлж чадлаа. Өнөөдөр өглөө болсон цувралын зургаа дахь тоглолтод талбайн зочин баг "Пейсерс" 91:77 харьцаатай ялалт байгуулж, цувралын харьцааг 3:3 болгон тэнцүүлэв. Тоглолтод “Индиана”-гийн Пол Жорж 28 оноо авч багаа тэргүүлсэн бол Девид Уэст, Рой Хибберт нар дабль-дабль хийж, багтаа тус үзүүлжээ. Харин эсрэг багаас ЛеБрон Жеймс 29 оноо авч, бүх тоглогчдыг тэргүүлсэн ч багаа хожилд хөтлөхөд хангалттай байсангүй.

Өнөөдөр өглөөний тоглолтод орчин цагийн их гурвал гэгдэж байгаа Крис Бош, Дуейн Вейд, ЛеБрон Жеймс нар тун бага оноо авсан нь багаа хожигдоход хүргэсэн гэдгийг мэргэжилтнүүд тайлбарлаж байна. “Миний хувьд энэ удаагийн тоглолт маш муу тоглолт болсон гэж үзэж байгаа. Бид өөрсдөдөө хэтэрхий итгэчихсэн байж. Тоглолт ерөөсөө гарсангүй. Өнөөдрийн тоглолтыг мартаад дараагийн тоглолтдоо анхаарах нь бидний хувьд маш чухал асуудал” гэж “Майами Хит”-ийн ЛеБрон Жеймс ярьжээ. Өнөөдөр “Майами Хит”-ийг хожиж долоо дахь тоглолтыг гаргасан “Индиана”-чууд хамгийн сүүлд 2000 онд бүсийнхээ аваргаар шалгарч байсан юм. Харин NBA гэж нэрлэгдсэнээс хойш нэг ч удаа түрүүлж байгаагүй билээ.