ОУОХ-ны дүрмийн дагуу тус байгууллагын ерөнхийлөгч нь зөвхөн нэг удаа найман жилээр сонгогдон, дахин нэг удаа дөрвөн жилээр улиран сонгогдох эрхтэй байдаг. Тиймээс одоогийн ерөн­хий­лөгч Жак Рогге хоёр удаагийн сонгуулийн бүрэн эрхийн хугацааны  албан үүргээ  дуусган ажлаа хүлээлгэн өгөхөөр болжээ. 

ОУОХ-ны Ерөнхийлөгч Бель­ги улсын иргэн Жак Рогге нь 2001 оны долдугаар сарын 13-16-нд ОХУ-ын Москва хотод болсон ОУОХ-ны 112 дугаар чуулганаар ерөнхийлөгчөөр сон­гогдон Испанийн  Хуан Ан­тонио Самаранчаас үүрэгт аж¬лаа хүлээн авч байлаа. Жак Рогге нь 2001 онд дөрвөн хүнтэй өрсөлдөж ялалт байгуулсан. Түүнтэй Ким Ун Ён, Р. Паунд, Ф. Анита, П.Смит нар өрсөлдсөн бөгөөд эднээс тухайн үед хам­гийн хүчтэй нь ОУОХ-ны дэд ерөнхийлөгчөөр ажиллаж байсан БНСУ-ын иргэн Ким Ун Ён байв.

Энэ удаагийн ОУОХ-ны ерөнхийлөгчийн нэр дэвшүүлэх үйл ажиллагааг харахад сонгууль ихээхэн өрсөлдөөнтэй болох шинжтэй байгаа юм.

Одоогийн байдлаар ОУОХ-ны ерөнхийлөгчид тус байгууллагын дэд ерөнхийлөгч Томас Бах, Сэр Миан Нг, гүйцэтгэх хорооны гишүүн Сергей Бубка, Чин Куо Ву, ОУОХ-ны гишүүн Ричард Кэррион, Денис Освальд нар албан ёсоор нэрээ дэвшүүлж, өрсөлдөхөөр болжээ.

Ингээд олимпийн хорооны ерөнхийлөгчид нэр дэвшигчдийг танилцуулья.

Германы иргэн Томас Бах нь 1991 оноос эхлэн ОУОХ-ны гишүүнээр ажиллаж байгаа бө¬гөөд улсынхаа олимпийн хорооны ерөнхийлөгч, олон улсын спортын туршлагатай зүтгэлтнүүдийн нэг юм. Тэрбээр энэхүү албан тушаалд хүчтэй өрсөлдөгч нарын нэг юм.

Сингапурын иргэн Миан Нг нь “Сингапур-2010” хүүхдийн анх­дугаар олимпийн наадмыг эх орондоо явуулахад зохион байгуулах хорооны даргаар ажилласан.

Пуэрто-Рикогийн иргэн, банкир Ричард Кэррион нь ОУОХ-ны санхүүгийн хорооны телевизийн эрхийг худалдаалах комиссын даргаар ажилладаг бизнесмен хүн.

Украиний иргэн Сергей Бубка. Олон улсын хөнгөн атлетикийн холбоо (IAAF)-ны дэд ерөнхийлөгчийн ал¬бан тушаалтай. Тулгууртай харайл¬тын дэлхийн дээд амжилтыг олон удаа тогтоосон тэрбээр нэр дэвшигч нараас хамгийн алдартай нь.

Тайваний иргэн  Чин Куо Ву нь 1988 оноос хойш ОУОХ-ны гишүүнээр сонгогдсон, олон улсын боксын холбоо (AIBA)-ны ерөнхийлөгчөөр 2006 оноос ажилласан.

Швейцарийн иргэн Денис Освальд нь олон улсын ровингийн холбооны ерөн­хийлөгчөөр ажиллаж байсан. Хуульч мэргэжилтэй. Зуны олимпийн спортын төрлүүдийн холбооны ерөнхийлөгч, “Лондон-2012” олимпийн зохи¬цуулах хорооны даргаар ОУОХ-г төлөөлөн ажиллаж байсан туршлагатай.

Б.ЗҮЧИ
Эх сурвалж: "ӨДРИЙН ШУУДАН" сонин