Монголын триатлоны холбооны (МТрХ) тэргүүлэгчдийн хурал саяхан хуралдаж, холбооны шинэ ерөнхийлөгчөөр Нийслэлийн газрын албаны дарга Цэндсүрэнгийн Сандуйг сонголоо. Тэрбээр 1970 онд Улаанбаатар хотноо төрсөн. Арван жилийн 31 дүгээр дунд сургууль, ОХУ-ын Москва хотын Эдийн засаг, статистикийн дээд сургуулийг дүүргэснээс хойш Нийслэлийн газрын албаны бүх шат дамжлагад ажиллаж ирсэн, эрч хүчтэй залуу менежер билээ. Тэрбээр спортын үнэнч фэн бөгөөд нэг бус спортоор хичээллэдэг. 2005 оноос хойш МТрХ-г толгойлж ирсэн УИХ-ын эрхэм гишүүн С.Бямбацогтыг хүндэт ерөнхийлөгчөөр өргөмжилжээ. Энэ онд Монголын триатлоны хамт олон амрах чөлөөгүй байх нь. Дэлхийн хүүхдийн анхдугаар олимпийн наадамд тамирчин Т.Энхжаргал (Монгол Улсаас гуравхан тамирчин эрхээ биелүүлсэн) нь эрх авч хурд хүчээ сорих бол оны сүүлчээр “Гуанжоу-2010” Азийн XVI наадам, “Мускат-2010” Азийн элсний спортын II наадамд мөн тамирчдаа бэлтгэж оролцуулна. Тивийн хэмжээний бусад уралдаан тэмцээний зэрэгцээ Улсын аварга шалгаруулах V тэмцээнээ наймдугаар сарын 1-нд “Найрамдал” зусланд зохион байгуулж, мөн сарын 28-31-нд Улаанбаатар хотноо Азийн дасгалжуулагч, шүүгчдийн семинарыг хүлээн авахаар болжээ.