Байерн хамгийн өндөр үнэ цэнэтэй баг Аваргуудын лигийн шинэхэн аварга Байерн Мюнхэн дэлхийн хамгийн үнэ цэнэтэй клубээр тодорчээ. Энэ жагсаалтыг олон жил тэргүүлж байсан Манчестер Юнайтед Германы багт байраа тавьж өгсөн байна.

Дэлхийд нэр хүндтэй "Brand Finance" санхүүгийн группын гаргасан судалгаагаар Байерн Мюнхэн 860 сая доллараар үнэлэгдсэн байна. (570 сая фунт)

Испаний хоёр "аварга загас" Реал, Барса 3 болон 4-р байранд эрэмбэлэгдсэн бол дараагийн байруудад Челси, Арсенал, Ливэрпүүл, Ман Сити гэсэн дарааллаар жагссан байна.

Харин АС Милан Италийн багуудаа өнгөлж эхний 10 байранд багтсан.

Хэдийгээр Байерн клубын түвшинд Юнайтедийг гүйцэж түрүүлсэн боловч лигийн хувьд премьер лиг бусдаасаа тасархай байна. Английн топ багуудын үнэ цэнэ нийтдээ 3.1 тэрбум доллараар үнэлэгдэж байна. (2 тэрбум фунт)

Харин Бундеслиг 1.9 тэрбумаар аман хүзүүдсэн байна.

"Brand Finance" -ийн ерөнхий захирал Дэвид Хай Байерн Мюнхэний энэхүү амжилтанд тэдний санхүүгийн эрүүл зөв бодлого болон тогтвортой тоглолт нь нөлөөлж байна хэмээжээ.

"Клубууудыг дэлхийн брэнд болгож, өндөр ашиг олох эхлэлийг Англичууд тавьсан. Тэдний араас олон лигүүд энэ жишгээр ажиллаж байгаа.

Гэхдээ тоглогчдын цалин дэндүү өндөр болж, алдагдал хүлээх болсноор Англичууд менежмэнт талдаа тэргүүлэгч байхаа больж байна.

Харин хямд тасалбар, дүүрэн үзэгч, санхүүгийн зөв бодлогоороо Бундеслиг яах аргагүй онцгойрч байна. Цаашдаа ч тэдний нэр хүнд улам нэмэгдэх байх"