Шатахууны үнийг зургадугаар сард бууруулна гэсэн мэдээллийг албаныхан өгсөөр байгаа билээ. Тэгвэл ойрын өдрүүдэд шатахууны үнийг 50 төгрөгөөр буулгах зорилготой ажиллаж байгаа тухай Уул уурхайн яамнаас мэдээллээ. Ийнхүү шатахууны үнэ буух үндэслэлийг албаныхан шатахуун импортлох эх үүсвэр харьцангуй их болсонтой холбон тайлбарлаж байна.

Монгол Улс сардаа 60-70 мянган тонн шатахуун хэрэглэдэг бөгөөд 2012 оны намар хүртэл ОХУ-ын “Роснефть” компаниас шатахууныхаа хэрэглээний 90 хувийг бүрдүүлж, хамааралтай байсан бол одоо энэ байдал өөрчлөгдөж, 40 хувьтай болсон байна. Харин шатахууны үлдсэн хэрэглээг БНСУ, Беларусь, БНХАУ-аас авч байгаа учраас ийнхүү үнэ буурах боломжтой болжээ. Үүн дээр нэмэгдээд эх орны газрын тосыг Хөх хотын нефть боловсруулах үйлдвэрт боловсруулж, “Монгол-93” шатахуун авч байгаа нь мөн нөлөөлсөн гэж албаныхан тайлбарлалаа.