Уул уурхайн бүтээн байгуулалтын ажил геологийн зураглалаасаа 20-30 жилээр түрүүлж явах ёстойг судлаачид сануулдаг. Гэвч манайд геологийн судалгаанд хөрөнгө мөнгө дутмаг байдгаас хоцрогддог хэмээн геологчид гомдоллодог. Тэгвэл өчигдөр геологи, хайгуулын чиглэлээр дэлхийд  дээгүүр ордог Франц улсын Геологийн албатай  Ашигт малтмалын ерөнхий газар хамтран ажиллахаар болж, санамж бичигт гарын үсэг зурлаа. Гэрээг Францын Геологийн албаны дарга Жан Франсуа Рокки болон Ашигт малтмалын газрын дэд дарга Д.Үүрийнтуяа нар үзэглэсэн. Түүнчлэн тус арга хэмжээнд Уул уурхайн яамны дэд сайд  О.Эрдэнэбулган болон холбогдох албан тушаалтнууд, Монгол улсад суугаа Францын элчин сайд Ив Дэлунэ, Францын Геологийн албаны төлөөлөл оролцсон юм.Манай улс Геологийн салбарын бодлогыг зангиддаг Геологийн албатай болоход мөн ашигт малтмалын үнэлгээ, ашигт малтмал, геологийн мэдээллийн сантай болох, сансрын геологийн хайгуул хийх ажилд Францын Геологийн албын туршлага, дэмжлэг, ихээхэн чухал гэдгийг Уул уурхайн яамны дэд сайд О.Эрдэнэбулган онцолсон. Түүнчлэн геологийн судалгаа, шинжилгээний чиглэлээр Франц улсад мэргэжилтэн бэлтгэх, техник технологио автоматжуулахад Францын туршлагыг манайх нэвтрүүлэх юм байна. Манай улс 15 жилийн өмнөөс Франц улсын томоохон компаниудтай шатдаг занар, уран, хөрөнгийн зах зээлийн чиглэлээр хамтран ажиллаж байгаа туршлагтайг талууд онцолж байсан. Тухайлбал, Франц улсын “Арева Монгол” компани дэлхийн хамгийн том ураны ордыг Дорноговь аймгийн Улаанбадрах суманд нээн, олборлолт хийж буй.

Энэ үеэр гэрээнд гарын үсэг зурсан хоёр талын хийхээр төлөвлөж буй ажлын талаар сонирхсон юм.

Францын Геологийн албаны дарга Жан Франсуа:

-Манайх Франц улсын Геологийн алба буюу төрийн байгууллага учир төрийн бодлогоо хэрэгжүүлэхэд дэмжлэг үзүүлдгээс гадна хамгийн сүүлийн үеийн өндөр техник, технологи ашигладаг гэдгээрээ давуу талтай. Манайх дэлхийн геологи, хайгуулын байгууллагуудаас хоёрдугаарт бичигддэг. Бид эхний ээлжинд улсдаа  геологийн эрэл хайгуул, уул уурхайн хаалт, байгаль орчны үнэлгээний чиглэлээр 3-4 хүн сургах бодолтой байна. Мөн Монголд сургагч багш нарыг ирүүлж, туршалгаа хуваалцах ч боломжтой. Цаашдаа танай улсад Геологийн алба байгуулах, судалгаа, шинжилгээ хийх томоохон төсөл, хөтөлбөр хэрэгжүүлэх чиглэлд хамтарч ажиллана.

Ашигт малтмалын газрын дэд дарга Д.Үүрийнтуяа:

-Манай улсын нутаг дэвсгэр 1:200 мянганы масштаб­тай зураглалд ор¬сон байгаа бол  1:50 мянганы нарийвчилсан зураглалд нутаг дэвсгэрийн 24 хувь нь хамрагдаад бай­гаа. Судалгааны үр дүнд 80 гаруй төрлийн ашигт малтмалын 1000 гаруй орд найман мянган эрдэсжсэн цэг илрүүлж мэдээллийн сан бүрдүүлсэн. Францын Геологийн албатай хамтарч ажилласнаараа бид геологийн хайгуул, зураглал, ашигт малтмалын үнэлгээ, ашигт малтмал, геологийн мэдээллийн санг бүрдүүлэх, уул уурхайн хаалт, нөхөн сэргээлтийн чиглэлд хамтран ажиллаж, чиглэл бүр томоохон төсөл, хөтөлбөр болон өргөжих боломжтой юм. Манайх одоогоор 2D зураглал ашиглаж байгаа бол Франц улс нутаг дэвсгээрээ 3D зураглалаар бүрхэж, улс орныхоо хаана нь ямар ашигт малтмал байгааг нарийн мэдэж авсан гэсэн үг. Бидний цаашдын зорилт Францын жишигтэй ойртож, нутаг дэвсгэрээ 3D геологийн зураглалаар бүрхэх юм.