Сагсан бөмбөгийн Үндэсний Супер Лигийн плэй-оффын цувралын тав дах тоглолтууд өчигдөр боллоо. Энэ өдөр “Танан Гарьд” болон “Энержи Ресурс Харцага” багуудын тоглолт хоёр нэмэлт цаг сунгасны эцэст “Гарьдууд” хожиж, Үндэсний Супер лигийн аваргын төлөө тоглохоор боллоо.

“SBL Хүлгүүд” цувралыг тэргүүлж эхэллээ

Плэй-оффт нэг болон дөрөвдүгээр байраар шалгарсан “Эрдэнэдрийлинг Ригс”, “SBL Хүлгүүд” багийн цуврал сонирхолтой өрнөж, 2:2 харьцаатай  тэнцээд байсан. Сүүлийн хоёр тоглолт дараалан хожигдоод байсан “SBL Хүлгүүд” энэ тоглолтод гарааны бүрэлдэхүүндээ өөрчлөлт оруулж, Marcus Hammonds-г гараанд гаргасан байлаа.

Тоглолтын эхний үед “SBL” оноогоор илүүрхэж, 10 оноогоор тасраад байсан. Гэсэн ч нэгдүгээр үеийн цаг дуусах мөчид “Ригс”-ийн багийн ахлагч Н.Золжаргалын холын зайн шидэлт амжилттай болж, багаа сэргээсэн. Мөн Devon Clarke, Marcus Skinner, Б.Билгүүн нар цагариган дээрээс хүчтэй довтолж, өрсөлдөөнийг улам ширүүсгэж байлаа. Мөн эхний хагаст Эрдэнэдрийлинг Ригсийн довтлогч С.Өрнүүбилэг 12 оноо, 11 самбар авч дабль  дабль гүйцэтгэжээ. Ингэснээр эхний хагас 43:43-ийн харьцаатай тэнцээгээр өндөрлөсөн.

Харин тоглолтын сүүлийн хагаст “SBL Хүлгүүд” онооны давамгайллыг авч эхэлсэн. “SBL Хүлэгүүд”-ээс энэ тоглолтод Б.Билгүүн багаа тэргүүлж, 25 оноо, 10 самбар, долоон хаалт, Дэвон Кларк 16 оноо, Маркус Хаммондс 14 оноо, 14 самбар, М.Бадрах 13 оноо авчээ. Ингэснээр “SBL Хүлгүүд” 68:82-ийн харьцаатай ялалт байгуулж, цувралыг 3:2-оор тэргүүлж эхэллээ. Харин “Эрдэнэдрийлинг Ригс”-ээс С.Өрнүүнбилэг 16 оноо, 18 самбар, Б.Батжавхлан 14 оноо, Маркус Скиннэр 14 оноо, 14 самбар, Дийн Хэдли 12 оноо, Н.Золжаргал 10 оноо авчээ. Цувралын шийдвэрлэх зургаа дахь тоглолт өнөөдөр 18:00 цагаас Спортын төв ордонд болно.

“Танан Гарьд” аваргын төлөө тоглохоор боллоо

Үүний дараагаар “Танан Гарьд” болон “Энержи Ресурс Харцага” багууд тоглосон. Цувралыг “Танан Гарьд” 3:1-ээр тэргүүлж байсан учир “Харцагууд” энэ тоглолтод хожихгүй бол тэмцээнийг өндөрлүүлэх болоод байсан. Иймээс ч тоглолт эхнээсээ маш ойрхон өрсөлдөөнтэй явагдсан. Тоглолтын гуравдугаар үе  өндөрлөхөд “Танан Гарьд” оноогоор давамгайлж, 59:54-ийн харьцаатай илүүрхэж дуусгасан. Эхний хагаст “Харцагууд”-аас Б.Сайнбаяр тун сайн тоглож, 14 оноо авсан бол, “Танан Гарьд” багаараа тун жигд тоглолт гаргажээ.

Гэсэн ч тоглолтын дөрвдүгээр үед “Харцага” баг гайхалтай тоглолт үзүүлсэн. Тэдний хамгаалалт тун сайн байж, мөн самбар доороос Б.Одбаяр, Б.Болортулга нарын олон довтолгоо амжилттай болж байлаа. Мөн тоглолтын үндсэн цагийн төгсгөлд Харцагуудад хожил авах боломж гарч, сүүлийн 15 секундэд  6 торгуулийн шидэлт гүйцэтгэсэн. Гэсэн ч Б.Одбаяр, П.Болортулга, Г.Баттөр нар тус бүр 1 шидэлтээ алдсан. Мөн “Харцагууд” техникийн алдаа авсанаар, Aнтонио Жонес торгуулийн 2 шидэлтээ амжилттай хийсэн. Ингэснээр үндсэн цаг 75:75-ын харьцаатай тэнцээгээр өндөрлөсөн.

Нэмэлт цагт багуудын довтолгоо ээлжлэн амжилттай болж байснаар, оноо мөн л 81:81-ийн харьцаатай тэнцсэн. Эхний нэмэлт цагийн сүүлийн довтолгооныг “Энержи Ресурс Харцагууд” хийсэн ч, “Танан Гарьд”-уудын хамгаалалт амжилттай болсон.

Энэ тоглолтонд “Харцагууд”-аас П.Болортулга 22 оноо, 27 самбар, Б.Одбаяр 20 оноо, 22 самбар, О.Сайнбаяр 16 оноо, Г.Баттөр 12 оноо, 8 оновчтой дамжуулалт, Б.Дорждамба 10 оноо, 12 самбар авчээ. Харин Гарьдуудаас О.Ууганбаяр 19 оноо, М.Дорждавга, М.Отгонмөнх нар 14 оноо, Фреддье Вүүдс 13 оноо, 26 самбар, Aнтонио Жонес 12 оноо, Б.Мөнхболд 10 оноо авчээ.

Ширүүн өрсөлдөөнөөр дүүрэн болсон энэ тоглолтын хоёр дахь нэмэлт цаг ч мөн маш өрсөлдөөнтэй болсон. Цаг дуусахад 22 секунд үлдээд байхад Г.Баттөрийн холын зайн шидэлт амжилттай болсоноор оноог 90:90-ийн харьцаатай болгож тэнцүүлсэн. Гэсэн ч долоон секунд дутуу байхад “Гарьд”-ын Фреддье Вүүдс оролт хийх үед алдаа гарсан юм.  Тэрээр торгуулийн нэг шидэлтээ амжилттай болгож, үргэлжлүүлээд бөмбөг таслалт хийсэн. Ингэснээр  маш хүнд болсон энэ тоглолтод “Танан Гарьд” баг 91:90-ийн харьцаатай хожлоо. Харин “Энержи Ресурс Харцага”  хоёр тоглолт дараалан нэг  оноогоор хожигдож, харамсалтай ялагдал хүлээлээ. Ийнхүү “Танан Гарьд” цувралд 4:1-ээр ялалт байгуулж, Үндэсний супер лигийн аваргын төлөө тоглохоор боллоо.