УИХ-ын гишүүн Г.Уянга өнөөдөр мэдээлэл хийлээ. Тэрээр Монгол Улсын Ерөнхийлөгчид нэр дэвшигчдэд хандан гурван асуулт хүргүүлж байгаа аж. Асуулга хүргүүлж буй шалтгаанаа тэрбээр “Монгол Улс нийгмийн хөгжлийн цоо шинэ замыг сонгосноос хойш 23 жил өнгөрч зургаа дахь ерөнхийлөгчөө сонгох цаг хаяанд тулаад байна. Хорь гаруй жилийн өмнө сонгосон нийгэмдээ засвар хийх цаг болсон тухай, улстөрийн намуудыг шинэчлэх тухай, Үндсэн хуулийн өөрчлөлтийн тухай бүх нийтээрээ ярих болсон энэ цаг үе дор зургаа дахь удаагийн Ерөнхийлөгчийн сонгуульд Та бүхэн нэр дэвшээд байна. Сонгуулийн үр дүнгээс үл хамааран Монголын нийгмийн өмнө гарцаагүй тулгараад байгаа дараах түлхүүр асуудлуудад нэр дэвшигчдийн хандаж байгаа хандлага,тов тодорхой байр суурийг олон нийт мэдэх нь өдгөө ихээхэн ач холбогдолтой юм. Нөгөө талаар эдгээр нь эргээд сонгуулийн үр дүнд нөлөөлөхүйц түлхүүр асуудлууд мөн бизээ. Ийм учраас Ерөнхийлөгчийн сонгуульд нэр дэвшиж байгаа. Та бүхнээс энэхүү амин чухал асуудлуудад хариулт авч, байр суурийг тань олон нийтэд хүргэх бололцоо олгохыг хүсч байгаа учраас энэхүү асуулгыг хүргүүлж байгаа” хэмээн тайлбарлав.

Түүний нэр дэвшигчид хандсан гурван асуулт нь
Нэг.  Өнөөдрийн нийгмийн мухардал, хямралыг засах бүх оролдлого эцсийн дүндээ Үндсэн хуульд тулаад зогсож байна. Монгол Улсын төрийн байгууламж, түүний үйл ажиллагааны механизмыг өөрчилж шинэчлэхгүйгээр цаашид дорвитой нэг ч алхам хийх боломжгүй нь нэгэнт тодорхой болоод байна. Иймд Үндсэн Хуулийг шинэчлэн өөрчлөх талаар ямар алхам хийх вэ? Үндсэн хуулийн өөрчлөлтийн хүрээнд, Монголын бараг бүх улстөрчдийг багтаасан олигархи бүлэглэл, түүнээс хамаарч байгаа улс төрийн намуудыг хэрхэн шинэчлэх вэ?

Хоёр. Хүн амын олонхийг ядууруулж, баян хоосны хэт ялгааг тэтгэсэн, ямар ч системгүй, тохиолдлын шинж чанартай, хэт үрэлгэн, хувь хүмүүсийн болон аж ахуйн нэгжийн төслүүдийг бүтээн байгуулалт, төрийн эдийн засгийн бодлого гэж эндүүрэн нэрлэсээр 20 гаруй жил болж байна. Үүнийг үндэсний эрх ашигт суурилсан, шинжлэх ухааны үндэслэлтэй, төлөвлөсөн зорилго чиглэлтэй эдийн засгийн бодлогоор хэзээ солих вэ?

Гурав. Өмнөх амлалтын биелэлт бол олон нийтийн сонголтоо хийх нэг гол шалгуур төдийгүй улстөрчийн хариуцлагыг илтгэх томоохон дэнс юм. МАХН /одоогийн МАН/ АН-ын 2008 оны сонгуулийн амлалт өнөөг хүртэл биелэгдээгүй, иргэн бүхэн энэ амлалтаас тэгш хүртэж чадаагүй байна. Та бүхэн тодорхой амлалт иргэдийнхээ өмнө авсан тэр л намуудаас нэр дэвшиж байгаа, өөрсдөө ч 2 500 000 төгрөгийн амлалтыг нь өгүүлнэ хэмээн амлаж гарч ирж байсны хувьд амлалтандаа хариуцлагатай хандах үүрэгтэй билээ. Хэрэгжүүлээгүй байгаа дээрх амлалтынхаа биелэлтийг хэрхэн гүйцээх вэ? гэсэн асуултад хариулт авахыг хүсчээ.