Эрчим хүч, геологи, уул уурхай, барилгын салбарт мэргэжилтэй ажилчин бэлтгэдэг Налайх дүүрэг дэх Мэргэжлийн сургалт үйлдвэрлэлийн төвд өчигдөр /05.21/ “Мэргэжил сурталчилах өдөрлөг” зохион байгууллаа. Сургуулийн үйл ажиллагааг нийтэд сурталчилах, элсэгчдийн тоог нэмэгдүүлэх, ерөнхий боловсролын сургуулийн төгсөх ангийн суралцагчдад  мэргэжлээ  зөв  сонгоход  нь дэмжлэг  үзүүлэх зорилгоор уг өдөрлөг зохион байгуулагдсан юм.

2013-2014 оны хичээлийн жилд тус сургууль мэргэжил эзэмшүүлэх 1 жилийн сургалт болон мэргэжлийн боловсрол эзэмшүүлэх 2,5 жилийн сургалтандаа барилгын засал чимэглэлч, барилгын мужаан, барилгын цахилгаанчин, авто машины засварчин, хүнд машин механизмын засварчин зэрэг мэргэжлээр элсэлт авахаар төлөвлөжээ. Мөн хүнд машин механизмын оператор, өрмийн машинч, гагнуурчин, тогооч, цахим тоног төхөөрөмжийн үйлчилгээний ажилтан, метал боловсруулах суурь машины оператор, барилгын сантехникч, агаар сэлгэлт халаалт хөргөлтийн тоног төхөөрөмжийн угсрагч, дулааны цахилгаан станцын цахилгаан тоноглолын засварчин, өндөр хүчдэлийн монтёр зэрэг мэргэжлээр мэргэжил эзэмшихийг хүсч байвал тус төвд хандах болох нь. Харин элсэлтийн шалгалтыг ирэх зургадугаар  сарын 10-ны өдөр 10.00 цагаас авах юм байна.