Монголын эстрад урлаг шинэчлэгдэж эхэлсэн 1990 оны эхэн үеэс хамтлаг, дуучид ар араасаа төрөн гарч рок, поп урлагт томоохон тэсрэлт хийж байлаа. Гэвч тухайн үед орцны хэмээх тодотголтой нэгдэн дуулж, хөгжимдөж байсан залуус өдгөө тус тусын амьдралаа хөөж урлагт үлдсэн нь цөөн. Харин урлагтаа үнэнч байж өдгөөг хүртэл дуулж яваа цөөн хэдэн уран бүтээлчдийн нэг нь “Харш” хамтлагийн дуучин С.Баасандорж. Дөч хол давсан ч 20 гаруй жилийн тэртээх шигээ цоглог хэвээр алхах энэ эрхэм олон түмний урилга, заллага, шоу, концертод хамтлагийнхаа хит дуунуудыг амилуулж, фенүүдээ баярлуулсаар явна. Өнгөрсөн жил уран бүтээлийнхээ гарааг эхэлсэн Хилийн цэргийн дуу бүжгийн тайзнаа хуучин цагийн дуунуудаа эгшиглүүлж, цэрэг хувцастай энгэрээ СТА хэмээх цол тэмдгээр мялааж авьяасаа үнэлүүлсэн. Уг нь фонограмны гавьяатуудыг бодвол амьд хоолойгоор цуцалтгүй дуулж, амьдралынхаа 29 жилийг урлагт зориулж ард түмнийхээ сонорыг мялааж яваа түүнд энэ шагнал хөнгөдсөн хэмээн үзэх хүн олон. Юутай ч СУИС-ийн магистрын зэргийг хангаж өдгөө  докторантад суралцаж буй Бааска тун удахгүй фенүүддээ бие даасан CD-гээрээ бэлэг барих сайхан мэдээг дуулгая. Хааяахан энд тэндээс эрээвэр хураавар сонсч сонороо мялаадаг эстрадын алтан үеийн дуунууд ийн цомог болон гарах нь тэр үеийн залуус, өнөө үеийн хижээл насныханд талархаж ханахгүй сайхан бэлэг байх биз ээ.

Нас үс дөч гарсан ч Hollywood хэмээх мөнгөлөг бичиг бүхий савхин жакет, ногоон жийнсээр гангарч, хорьт шиг үсэрч дэвхэрсээр яваа “Харш”-ийн Бааскаг “Би чамд хайртай" киноны Үрлээгийн дүрээр олонд танигдсан жүжигчин С.Пүрэвмаагийн төрсөн дүү гэдгийг хүмүүс тэр бүр мэдэхгүй болов уу. Монголын урлагт эгч нь дэлгэцийн бүтээлээр, дүү нь эстрадын дуугаар хувь нэмэр оруулж яваа гэхээр дуучин С.Баасандоржийн бахархал байж болох. Түүгээр ч барахгүй түүний бас нэгэн бахархал нь хоёр хүүхэд нь. Хүүхдүүдээ урлагийн замаар явуулахгүй хэмээн эрс шийдсэн түүний бага хүү “Монген”-д сурдаг. Харин том хүү нь уул уурхайн чиглэлээр боловсрол эзэмшсэн залуу байдаг бөгөөд өдгөө мэргэжил дээшлүүлэхээр суралцаж буй гэнэ лээ.