Сонгуулийн ерөнхий хороо маргааш 09.00 цагт хуралдана. Энэ хуралдаанд сонгуулийн хороодын дарга нар оролцох бөгөөд сонгуулийн хуулийн хэрэгжилт, бэлтгэл ажлын талаар ярилцах юм байна.

Монгол Улсын Ерөнхийлөгчийн сонгуулийн санал хураалт зургадугаар сарын 26-нд болох билээ. Энэ жилийн сонгуульд гурван нэр дэвшигч өрсөлдөнө. Тодруулбал, АН-аас одоогийн Ерөнхийлөгч Ц.Элбэгдоржийг, МАН-аас УИХ-ын гишүүн Д.Бат-Эрдэнийг, харин МАХН-аас Эрүүл мэндийн сайд Н.Удвалыг тус тус дэвшүүлээд байгаа билээ. УИХ-д суудалтай бусад намууд МҮАН, ИЗНН-ын хувьд Ерөнхийлөгчийн сонгуульд АН-ыг дэмжиж оролцоно гэдгээ мэдэгдээд байгаа.

Сонгуульд өрсөлдөх намуудын тухайд нэр дэвшигчдээ бүртгүүлэхээр холбогдох шаардлагатай бичиг баримтыг СЕХ-нд хүргүүлээд буй. СЕХ нь нэр дэвшигчдийн баримт бичгийг шалгаж, хуулийн дагуу байна гэж үзвэд тавдугаар сарын 22-нд буюу ирэх лхагва гаригт нэр дэвшигчдэд үнэмлэхийг нь олгох юм. Нэр дэвшигчид үнэмлэхээ гардсан цагаас сурталчилгаа эхлүүлэх хуулийн заалттай юм.