Залуу дуучин Доржсүрэнгийн Нямдаваа бие даасан анхны тоглолтоо "Буриад зоны аялгуу" нэртэйгээр энэ сарын 18-ны 15.00 цагт "Улаанбаатар" чуулгын концертын их танхимд толилуулах гэж байна. Түүний тоглолтод Ардын жүжигчин А.Энхтайван, Гавьаят жүжигчин С.Батсүх, Соёлын тэргүүний ажилтан Л.Эрдэнэбаатар, Ч.Чинзориг, Ч.Бадрал, ДБЭТ-ын дуучин Г.Шижирболд, ТЗДБЧ-ын дуучин Н.Дашдэмбэрэл нар оролцох юм байна.

Дуучин Д.Нямдаваа Гавьяат жүжигчин С.Батсүхийн дуулсан Г.Жаргалсайханы хөгжим, Г.Сонинбаярын шүлэг “Хорь буриадын нутаг” дууг С.Батсүх гавьяатын хамт шинэчлэн дуулж олны хүртээл болгоод байгаа юм. Мөн түүний дуулсан, Ардын жүжигчин А.Энхтайваны хөгжим, Гавьяат багш Н.Ням-Осорын шүлэг “Балжмаахан” дуу фм, радиогоор сонсогчдод хүрээд байгаа билээ. Дээрх уран бүтээлээс гадна Д.Нямдаваа анхны цомогтоо орсон дуунуудыг “Буриад зоны аялгуу” тоглолтын үеэр үзэгчдэд зориулан дуулах гэнэ.