ETV телевиз “WORLD CUP 2014”-г  албан ёсны онцгой эрхтэйгээр авлаа.

Хүн төрөлхтний их баяр цэнгэл бол хаан спорт хөлбөмбөгийн Дэлхийн аварга шалгаруулах тэмцээн билээ. Дэлхийн долоон тэрбум хүнийг нэг дор нэгтгэж чаддаг ганц зүйл бол спорт, тэр дундаа хөлбөмбөгийн ДАШТ юм. Дэлхийн ард түмэнд баяр баясал авчирч гайхамшгийг мэдрүүлэх энэ аугаа тэмцээнийг Монгол эх орондоо шууд дамжуулах албан ёсны онцгой эрхийг “Тод харуулна” уриатай ETV HD телевиз авч, ард түмэндээ бэлэг барьж байна. Энэ талаар өнөөдөр тус телевизийн удирдлагууд болон спортын албаныхан мэдээлэл хийлээ.  

Яг нэг жилийн дараа манай гараг болоод манай улс хөлбөмбөгийн Дэлхийн аварга шалгаруулах тэмцээнээр амьсгалах болно. Бүтэн сар төдийгүй бүтэн жилийн хугацаанд эх дэлхий хөлбөмбөгөөр амьсгалж, та бид дахин давтагдашгүй гайхалтай тоглолтуудын гэрч болж түүхийг бүтээлцэнэ. Хаан спортын Хаан гүрэн Бразил нэгэн жарны дараа Хаан спортынхоо их баяр цэнгэлийг хүлээн авахаар болж, А хэсгийг толгойлон 20 дахь удаагийн ДАШТ-ний 64 тоглолтын салхийг хагалж “Мундиаль” нээгдэнэ.

1930 онд Өмнөд Америк тив анхны ДАШТ-г өлгийдсөн түүхтэй бол 20 жилийн дараа дахин Өмнөд Америк тив дэр дундаа Бразил гүрэн эх нутагтаа ДАШТ-ийг хүлээн авч, аваргын төлөө шалгаран Уругвайд хожигдож, "Маракана" цэнгэлдэхэд чуулсан 200.000 мянган үзэгч мэгшин уйлсан түүхээ нэгэн жарны дараа давтахгүйн төлөө тоглоно. Эх дэлхийн 203 улсаас шигшигдсэн шигшмэл 32 улс “Алтан дагина”-ын төлөө шигшээ шатанд өрсөлдөх 64 тоглолтыг, “Евро 2012” Европын аварга шалгаруулах тэмцээнийг амжилттай шууд дамжуулсан туршлагатай ЕТV HD телевиз та бүхэндээ хүргэх болсондоо баяртай байна. Бид дуу, дүрс, тайлбарын өндөр түвшинд 20 дахь удаагийн ДАШТ-г шууд дамжуулах болно.

FIFA-ийн онцгой эрх борлуулагч “Football media service”-ээр дамжуулан энэхүү эрхийн авч, гэрээг хууль ёсны дагуу  байгуулсан бол дэлхийн аварга шалгаруулах тэмцээний өмнөх жил уламжлал болон зохион байгуулагддаг “Конфидрэйшн кап”-ыг энэ оны 06-р сарын 15-30-ны хооронд шууд дамжуулах юм.

Жич: Монголоос цөөнгүй телевиз тус тендерт өрсөлдөж, 2013 оны 4-р сарын 18-ны өдөр ЕTV HD телевиз “FIFA 2014” хөлбөмбөгийн дэлхийн аварга шалгаруулах тэмцээнийг Монгол Улсад дангаараа онцгой эрхтэйгээр шууд дамжуулах эрхийг авсан юм.