Английн “Манчестер Сити” багийн дасгалжуулагч Роберто Манчини ажлаасаа халагдлаа. Харин Манчинигийн туслах дасгалжуулагч Брайн Кидд “Сити”-г түр удирдахаар болж байна. 

Итали мэргэжилтэн Роберто Манчини 2009 оны 12 дугаар сараас өдийг хүртэл “Манчестер Сити”-г дасгалжуулахдаа багийн эзэн арабын шейх Мансурын хүссэн хэмжээнд дасгалжуулаагүй юм. Арабын шейх Мансур “Манчестер Сити” багийг худалдаж авсныхаа дараа “Аваргуудын лиг”-ийн тэмцээнд амжилт гаргахын төлөө Роберто Манчинигийн хүссэн тоглогчдыг өндөр үнээр худалдаж авсан. Гэсэн ч өнгөрсөн хугацаанд Манчини “Сити” багтай Английн “Премьер лиг”-ийн аваргаар нэг удаа, “FA cup” буюу холбооны цомын тэмцээнд нэг удаа түрүүлснээс өөр томоохон амжилт гаргаагүй юм.  Манчини “Манчестер Сити” багийг удирдан 194 тоглолтод оролцохдоо 115 хожил, 39 хожигдол, 40 удаа тэнцсэн гэсэн үзүүлэлттэй байна. Харин Европын хөлбөмбөгийн холбооны хамгийн нэр хүндтэй тэмцээн “Аваргуудын лиг” тэмцээнд гурав хожиж, дөрөв тэнцэн, дөрөв хожигдсон байна.

Ажлаасаа халагдсан Роберто Манчини Английн “Премьер лиг”-ийн хүрээнд 133 тоглолтод 82 удаа хожсон байна. Ингэснээр хожлын хувиараа Английн шилдэг дасгалжуулагчдын дөрөвдүгээр байрт шалгарсан байна.    

“Премьер лиг”-ийн шилдэг дасгалжуулагчдын хожлын хувь

	Тоглолт	хожсон	хожлын хувь
Жозе Моуриньо	120	85	70,83
Сэр Алекс Фергюсон	809	528	65,27
Карло Анчелотти	76	48	63,16
Роберто Манчини	133	82	61,63
Арсене Венгер	636	366	57,55
Рафаэль Бенитэс	253	140	55,34

Харин дасгалжуулагчаа халсан “Манчестер Сити” багийн удирдлагууд Испанийн “Малага” багийн дасгалжуулагч Мануэль Пиллигринийг дасгалжуулагчаар авахаар ажиллаж байна.