МАН-аас УИХ-ын 10 дугаар тойрог буюу Өвөрхангай аймагт нэр дэвшсэн С.Чинзориг “Ардчилсан нам иргэдийн саналыг худалдаж авсан” гэх мэдэгдлийг өнөөдөр хийлээ. “Ардчилсан намаас нэр дэвшсэн Г.Батхүү, Д.Зоригт нар шүүхийг өөрсдийн талд ашиглаж, хэтэрхий нэг талыг барьсан шийдвэр гаргасан тул Шүүхийн шийдвэрийг дахин харах ёстой” гэж тэр үзэж байгаа аж.

“Би энэ асуудлаар Дээд шүүх, үндсэн хуулийн цэцэд хандаж үзсэн. Гэтэл Дээд шүүх таны асуудлыг шүүхээс гуравдагч этгээдээр татах үндэслэлгүй гэж мэдэгдсэн учраас хэлэлцэх боломжгүй гэдэг. Харин үндсэн хуулийн цэц болохоор шүүхийн процесс дуусаагүй байгаа учраас хэлэлцэхгүй гэдэг. Нэг иймэрхүү байдалтай болчихоод байна. Өвөрхангай аймгийн шүүх хүмүүсийн саналыг хууль бусаар авах гэж завдсан гэж байгаа ч яг үнэндээ тийм юм ерөөсөө болоогүй. Шүүх хуралд ерөөсөө л Г.Батхүү, Д.Зоригт нарын хоёр өмгөөлөгч сууж байгаад шийдвэр гаргасан. Ийм байж болохгүй” гэж С.Чинзориг мэдэгдлээ. Тэрээр СЕХ-г хууль зөрчсөн гэж үзэн, цэцэд өгөх гэж байгаа бөгөөд ерөнхийлөгч Ц.Элбэгдоржид ч захидал хүргүүлэх аж. Мөн тэрээр МАН Өвөрхангайн асуудалд маш хойрго хандсан гэж үзэж байгаа гэдгээ ч хэвлэлийнхэнд мэдэгдсэн юм.