Эмэгтэйчүүдийн “Спрайт лиг”-ийн аваргийн төлөөх тоглолт өчигдөр болж, “Баянзүрх баг” тодорлоо.  Аваргын төлөө “Танан” болон “Баянзүрх” багууд шалгарч үлдээд байсан ба түрүүлж хоёр хожсон баг аварга болох байлаа. Хоёр багийн цувралын эхний тоглолтонд “Баянзүрх” баг хожил аваад байсан юм. Цувралын хоёр дахь тоглолтонд “Баянзүрх” багийнхан тоглолтын эхнээс санаачлагыг аван 10 гаруй оноогоор тэргүүлж эхэлсэн ба 3-р үед “Танан” багийн довтолгоонууд амжилттай болж оноог ойртуулсан боловч “Баянзүрх” багийн хариу довтолгоонууд амжилттай болж улмаар уг тоглолтыг тэргүүлж, цувралыг 2:0 гэсэн харьцаагаар МУ-ын Ууган гавьяат дасгалжуулагч Ц.Цэвэрбалаар удирдуулсан “Баянзүрх” баг түрүүлж аварга боллоо. Харин мөнгөн медалийг Ү.Давхарбаяр дасгалжуулагчтай “Танан” багийнхан хүртлээ.

Харин эрэгтэйчүүдийн 2013 оны “Спрайт Супер” лигийн аваргын төлөө Баруун бүсийн аварга “ИНЕГ-ын Буянт Ухаа”, Зүүн бүсийн аварга “Монторх” компаний “Монторх” багууд шалгарч үлдлээ.

“ИНЕГ-ын Буянт-Ухаа” баг бүсийн аваргын төлөө “Хасу Мегастарс” багтай цувралын шийдвэрлэх гурав дахь тоглолтонд хожил байгуулснаар аваргын төлөө тоглох эрхтэй болсон. Хоёр багийн тоглолт өмнөх тоглолтуудын адил тоглолтын эхнээс ширүүн тэмцэл дор өрнөж онооны тэргүүлэгч ээлж дараалан солигдож байлаа. “Мегастар” багаас Х.Золжаргал, Н.Алтаншагай, Г.Тулга нарын ээлж дараалласан холын зайн шидэлтүүд байндаа тусч, Ө.Улаанхүү, Б.Гүнсэнхорол, Р.Цэрэнбат нарын самбар доор идэвхтэй тоглолтыг үзүүлж байсан байсан бол Буянт-Ухаа багаас А.Тэмүүлэнгийн дундын зайн шидэлтүүд, төвийн тоглогчид О.Хонгорзул,Г.Идэр-Ууган нарын хослол амжилттай байлаа. Дөрвөн үеийн турш ширүүн өрсөлдөн оноо ойрхон байх үед “Буянт-Ухаа” багийн тоглогч А.Нямдаваагийн холын зайн дараалласан шидэлтүүд амжилттай болж цаг дуусахад таван минут орчим дутуу байхад багтаа найман онооны давамгай байдлыг бий болгосон юм. “Хасу Мегастарс” багийнханы хувьд оноог ойртуулах гэж хэт яаран холын зайн удаа дараалласан амжилтгүй шидэлтүүдийг гүйцэтгэж байлаа. Ийнхүү “ИНЕГ-ын Буянт-Ухаа” баг 3 дахь удаагаа СПРАЙТ СУПЕР ЛИГ-ийн аваргын төлөө шалгарч үлдлээ.

Зүүн бүсийн аваргын төлөөх хоёр болон гурав дахь тоглолтууд 1, 2-р үеийн таван тоглогчид солигдож тоглон гуравдугаар үе эхлэхэд “Капитал Шонхор” багийнхан 10 гаран оноогоор тэргүүлж эхлэн 4-р үеийн төгсгөлд “Монторх” багийнхан оноог ойртуулж тоглолтын ялагч сүүлийн мөчид тодрох гэсэн зураглал дор явагдсан гэхэд хилсдэхгүй болов уу. “Монторх” багийнхан цувралын хоёрдахь тоглолтонд оноо дутуу явсан ч тоог ойртуулж төгсгөлийн мөчид дамжуулалтаа алдан хожил байгуулах боломжоо алдаад байсан юм. Уг тоглолтонд “Капитал Шонхор” багийн тоглогч Р.Төмөр онцгой сайн байж багтаа хожил авчрахад чухал үүрэг гүйцэтгэсэн. Шийдвэрлэх гурав дахь тоглолтонд “Капитал Шонхор” багийн тоглогчидоос Төмөрийн дундын зайн шидэлтүүд, А.Баянбат, Х.Баатарсүрэн нар довтолгоонуудаа амжилттай гүйцэтгэж ялангуяа Х.Баатарсүрэн тун жигд тоглолтыг үзүүлж “Монторх” багийн хамгаалагчдын гол зогсоох ёстой тоглогч байсан бол “Монторх” багийн Х.Ундрах, Б.Нямбаяр, Мөнхбилэг, Тамжид, Сайнтөр гэсэн төвийн нуруулаг тоглогчид самбар доор илүүрхэж, Х.Батзолбоогийн идэвхтэй тоглолт үргэлжилж хоёр багийн оноо үндсэн цагт 70:70 харьцаатай өндөрлөсөн. 23 секунд дутуу байхад “Капитал Шонхор” багийнхан довтолгоог гүйцэтгэсэн ба цаг дуусахтай зэрэгцэн довтолсон Баатарсүрэнгийн довтолгоог Нямбаяр амжилттай хаалт тавин зогсоон багтаа нэмэлт цагт сунган тоглох боломжийг олгосон. Улмаар нэмэлт цагт мөн л төвийн тоглогчидийн сайн тоглолт, эгзэгтэй мөчид довтолсон Б.Нямбаярын гурван удаагийн дундын зайн довтолгоо, бусад тоглогчдын идэвхтэй хамгаалалт амжилттай болж “Капитал Шонхор” багийг буулган авч Зүүн бүсийн аваргаар шалгарч улмаар СПРАЙТ СУПЕР ЛИГ-ийн аваргын төлөө тоглох эрхтэй боллоо.

Аваргын төлөөх цуврал тоглолтууд энэ долоо хоногийн амралтын өдрүүдэд СТО-нд явагдана.