“Баейр Ливеркюзэн” клубийн жигүүрийн довтлогч Андре Шүрле ирэх улиралд Челсигийн бүрэлдэхүүнд багтаж магадгүй талаар Герман даяар шуугиж эхэллээ. Орон нутгийн сонины мэдээлснээр бол хоёр тал ерөнхийдөө тохиролцоонд хүрчихсэн бөгөөд багийн ерөнхий менежер энэ мэдээллийг баталсан байна. Чухам хичнээн еврогийн үнээр зарагдаж байгаа нь тодорхойгүй ч хэд, хэдэн тоглогчдыг ирэх улиралд “Ливеркюзэн” клубт зээлээр тоглуулах аж. “Хөлбөмбөгчин хүн өсч дэвжих ёстой. Тэр залуухан. Түүний өмнө их ирээдүй бий. Хувь хүн өөрийнхөө сонголтыг хийвэл бид хориглох эрхгүй шүү дээ” гэж “Ливеркюзэн” клубын менежер Вольфганг Холзаусер ярьжээ. Өдгөө 22 настай Герман довтлогч Майнц клубт 2009-2011 онд гялалзаж, Бундеслигийн түүх ихтэй багийн нэг болох Баейрт 8,5 сая фунтээр хүрэлцэн ирсэн билээ.